“LTG tu dū!” jaunīši gastej pi Latgolys deputatim Saeimā
Ūtardiņ, 5. decembrī, jaunīšu izaugsmis i Latgolys izzynuošonys programys “LTG tu dū!” jaunīši i latgalīšu kulturys kusteibys “Volūda” puorstuovi gasteja Latvejis Republikys Saeimā, sasateikūt ar deputatim, kas īvālāti nu Latgolys vieliešonu apgobola voi poši ir ar saknem Latgolā.
Ar jaunīšim i “Volūdys” puorstuovim Saeimā sasatyka i apsarunuoja vairuoku parteju, kai opozicejis, tai pozicejis, deputati – Anna Rancāne i Alīna Gendele (Jaunuo Vīnuoteiba), Jurs Viļums i Česlavs Batņa (Apvīnuotais Saroksts) i Mairita Lūse (Progresivī), taipat sasatikšonā pīsavīnuoja Annys Rancānis paleigs Sandis Mesters – jaunīts, kurs pats īt nu Dekšuoru.
Sasatikšonys pyrmajā daļā jaunīšim beja vareiba ekskursejā īpazeit Saeimys dorba ustobys, kai ari aizdūt sev interesejūšūs vaicuojumus par deputatu dorba kasdīnu i ritmu, taipat lāmumu pījimšonys procesu i sadarbeibu sovā vydā, bet ūtrajā daļā jau vaira apsarunuot par temom, kas skar politiskūs procesus i Latgolys interešu puorstuoviešonu, jau padzilinuotuok. Beja vareiba gasteit ari Saeimys bibliotekā, kurā kai pateikams puorsteigums izaruodeja regionalūs avīžu i žurnalu daīmameiba.
Jaunīšu izaugsmis i Latgolys izzynuošonys programa “LTG tu dū!” ir vīna nu latgalīšu kulturys kusteibys “Volūda” (bīdreibys “LgSC”) projekta “Latgaliskuos kulturvidis styprynuošona: sadarbeiba, izpratne i īsaiste” aktivitašu, kuru 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
