Lobdareibys koncerts Muotis dīnā

Atsasaucūt Latgolys audžusaimu bīdreibys “Muna sāta” i Latgolys školu atbolsta fonda “Veronika” aicynuojumam, “Latgolys Studentu centrs” aicynoj sevkuru itūsvātdiņ 8. majā 12 stuņdēs Reigys latvīšu bīdreibys noma Lelajā zalā iz lobdareibys koncertu “Veļtejums Muotis dīnā”, kurymā muzicēs grupa Boltī Luoči.

Vysi pasuocīņa laikā savuoktī leidzekli tiks izmontuoti bārnu izzinis i atpyutis braucīnim iz Baltejis jiurys krostu Kurzemē i Vidzemē.

Koncerta organizātuoji soka: “Audžusaimu stuovūklis Latgolā nav vīgls. Sevkura materiala ci finansiala paleidzeiba ir cīši vādzeiga i svareiga. Deļ tuo itūreiz pasuocīņa organizātuoju vēlme ir saguoduot bārnim prīcu i atpyutys šaļts, kas izītu uorpus īrostuos kasdīnis i spātu atstuot palīkūšus īsapaidus mozojuos sirdīs. Ceļuojums iz jiusu, kuru lela daļa Latgolys bārnu (nimoz narunojūt par tim, kuri nūklivušs audžu saimēs) kluotīnē nikod nav redziejušs, byutu vīnlaikus ari breineigi īspieja zynūša gida vadeibā padzilinuoti īpazeit Latvejis dobu i viesturi.

Nadreikst damierst, ka runa ite ir par bārnim, kas ir tryukums, atstumteibys sajiuta, naratai ari fiziskys cīšonus i slimeibys. Audžusaime jim dūd sātys sajiutu, apjausmu par saimis vierteibom i īaudzynoj ari dorba tikumu, nu mes vysi kūpā varam saryupēt itim bārnim peļneitu, jauku i naaizmierstomu duovonu itūvosor.”

Biletis cena 3-5 lati, biletis var nūpierkt Bilešu paradīzis kasēs i škārsteiklā.

 

 

 

 

 

 

 

 

 

Foto: Santa Ulnicāne (nu fotokonkursa “Eiropa Latgolā: lobs lobu namaitoj” arhiva)

 

Pastuosti cytim!

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.