LgSC pīsadola storptautiskuos apvuiceibuos Slovakejā

Nu 12. da 16. majam Slovakejis piļsātā Popradā nūtyka storptautiskys apvuiceibys “Angļu volūdys pylnveidis kursi jaunuotnis darbinīkim” (`English language training course for youth workers`). Tymūs pīsadaleja “Latgolys Studentu centra” puorstuove Vineta Vilcāne.

Apvuiceibys nūtyka “Erasmus+” programys ītvorūs, tūs mierkis beja uzlobuot jaunuotnis darbinīku angļu volūdys zynuošonys, kurys vāluok pīlītuot projektu dasacejumu sagataveišonai “Erasmus+” programai.

Angļu volūdys pylnveidis kursūs pīsadaleja Latvejis, Pūlejis, Čehejis, Ungarejis i Slovakejis jaunuotnis darbinīki, apvuiceibu process internacionalā vidē ļuove puorvarēt volūdys barjeru i uzlobuot komunikacejis prasmis svešvolūdā, kai ari īpazeit cytu vaļstu kulturu, dobu i cylvāku parodumus. Pīcu apvuiceibu dīnu laikā tyka nūstyprynuots projektu sagataveišonai napīcīšamais specifiskais vuordu kruojums, īgiuta cytu vaļstu organizaceju pīredze dorbā ar jaunuotni, diskutāts par naformaluos izgleiteibys nūzeimi myužizgleiteibys kontekstā, kai ari apgiutys jaunys naformaluos vuiceibu metodis.

Apvuiceibu nūslāgumā vysi jaunuotnis darbinīki sajēme Youthpass – sertifikatu, kas aplīcynoj īgiutuos kompetencis, pīvadumam, prasmi sasazynuot svešvolūdā, digitaluos prasmis i c. Itaids aplīcynuojums ir eipaši nūdereigs jaunīšim bez īprīkšejis dorba pīredzis, kod tūpūšais dorba deviejs pīprosa pīredzi i prasmis. Navaļstiskajā sektorā apgiutū var atzeimēt itymā sertifikatā i tū īsnīgt dorba deviejam.

“Erasmus+” ir Eiropys Savīneibys eistynuota programa izgleiteibys, apvuiceibys, jaunuotnis i sporta jūmuos, kas ilgs da 2020. goda. Sevkuram ir vareiba jimt leidzdaleibu programys eistynuotajuos aktivitatēs, dūdūtīs jaunys pīredzis i zynuošonu īgiušonā iz kaidu nu Eiropys vaļstim. Vaira informacejis par “Erasmus+” īspiejom atrūnams Jaunuotnis storptautiskūs programu agenturys sātys lopā jaunatne.gov.lv.

Vineta Vilcāne

 

 

 

 

 

Pastuosti cytim!

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.