LgSC fotoizstuode nūdūta Daugovpiļs Nūvodpietnīceibys i muokslys muzeja kruojumā
2015. godā, svietejūt bīdreibys “Latgolys Studentu centrs” (LgSC) 10 godu jubileju, tyka sareikuots fotokonkurss “Myusu Latveja”, kura rezultatā tope ceļojūša fotoizstuode “Kas tev ir Latveja?” ar 15 spylgtom foto biļdem. Niu, kod izstuode apceļuojuse Latgolys kulturys i izgleiteibys īstuodis, biļdis nūdūtys Daugovpiļs Nūvodpietnīceibys i muokslys muzeja paleigkruojumā kai sova laika foto līceiba.
Tai kai LgSC jubileja mieness sakreit ar Latvejis vaļsts svātkim, taišni partū ituo fotokonkursa amaterim tema – “Myusu Latveja” – tyka izvālāta patriotiskuos nūskaņuos. Pīsadaleit konkursā beja aicynuoti LgSC bīdri, aktivisti, draugi, kai ari cyti interesenti. Konkurss tyka reikuots ar mierki aicynuot dalinīkus pasadaleit īspaidūs par 10 godu laikā radzātū, dzierdātū, sajustū i padareitū, kai ari atlaseit i īsyuteit biļdis, kurymuos tys teik atspīgeļuots iz vysa lobuok.
Daleibai konkursā kūpā tyka īsyuteitys 40 biļdis, kurymuos paruodeits kotra autora personeigais redzīņs par sev i Latvejai svareigom šaļtim. Ceļojūšajā izstuodē “Kas tev ir Latveja?”, kuruos pyrmuo pīturvīta 2015. godā beja Rēzeknis Tehnologeju akademeja (tūlaik vēļ Rēzeknes Augstškola), beja apsaveramys 15 biļdis, kas vysspylgtuok atspīgeļuoja latvīšu nacionaluos pošapzinis boguoteibys i izjiutys.
Bīdreiba “Latgolys Studentu centrs” izsoka pateiceibu Dagnejai Dudarjonokai, Sandrai Švarcei i Gunai Gamazinai par īguļdeitū dorbu fotoizstuodis radeišonā i Guntai Ločmelei par ideju biļdis atdūt muzejam.