Laura Melne nomināta Baltvilka bolvai par debeju bārnu i jaunīšu literaturā

Latvejis Bārnu i jaunuotnis literaturys padūme paziņuojuse Storptautyskuos Jāņa Baltvilka bolvys 2023 nominantus, kai ari nūsaukuse bolvys storptautyskū laureatu, viestej publiski daīmamuo informaceja. AS “Latvijas Valsts meži” bolvai “Jaunaudze” par debeju bārnu i jaunīšu literaturā i gruomotu muokslā nomināta ari portala lakuga.lv redaktore Laura Melne par literarū davumu kūpā ar Viviannu Mariu Stanislavsku radeitajam komiksam latgaliski “Sunāns breiveibā”.

Bolvys žureja, kurā itūgod struoduoja literaturzynuotneicys Ilze Stikāne i Sandra Okuneva, muokslys pietneica Līna Birzaka-Priekule, muokslinīks Roberts Koļcovs, kai ari sabīdreibys puorstuovi Māris Pavlovs nu Latvejis Universitatis Izgleiteibys zynuotņu i psihologejis bibliotekys i Gusts Ābele, jaunīšu studejis “Kāpnes” vadeituojs, ir puorskaitejuse i izviertējuse 46 gruomotys, pīvieršūt viereibu teksta kvalitatei, i vēļ 19 izdavumi skaiteiti i apsavārti, meklejūt pretendentu gruomotu muokslys bolvai. Nūvāruoti vaira nakai 10 debitanti rakstnīceibā i ilustratora veikumā. Kūpumā sasaceņte 10 izdevnīceibu gruomotys. 

Par Jāņa Baltvilka bolvys storptautyskū laureatu 2023. godā atzeita leitovīšu rakstneica Igne Zarambaite par garstuostu “Melndzelmji” i tuo tulkuotuoja Dace Meiere. Iz Jāņa Baltvilka bolvu bārnu i jaunīšu literaturā pretendej: Aija Lisovska par literarū puorsoku “Dullā diena Dundurzālē”; Inese Zandere par biļžu gruomotom “Vai grāmatai ir knābis?” i “Kamoliņš un kastīte”; Žebers par dzejūļu kruojumu jaunīšim “Ejas un asakas” i Daina Tabūna par izzynūšū literarū puorsoku “Lasis Stasis un Atlasijas okeāns”. Iz Jāņa Baltvilka bolvu gruomotu muokslā pretendej: Andris Breže par ilustracejom Žebera dzejūlim “Ejas un asakas”; Rūta Briede par ilustracejom Inesis Zanderis gruomotai “Vai grāmatai ir knābis?” i Marta Pujāta dzejūļu gruomotai “Zenīts”; Ernests Kļaviņš par ilustracejom Juliana Tuvima dzejūļu gruomotai “Pans Trallalnieks” i Inesis Zanderis gruomotai “Kamoliņš un kastīte” i Ieva Jurjāne par ilustracejom Luīzis Pastoris garstuostam “Raiņa ielas cirks”.

Pretendenti AS “Latvijas valsts meži” bolvai “Jaunaudze” par debeju bārnu i jaunīšu literaturā i gruomotu muokslā ir Tuoms Deimonds Barvidis par fantazejis romanu “Zaļā Dzīle” i Laura Melne par literarū davumu kūpā ar Viviannu Mariu Stanislavsku radeitajam komiksam “Sunāns breiveibā” (Latgalīšu kulturys kusteiba “Volūda”, 2023). 

Par nominaceju Laura Melne soka: “Cīši lels puorsteigums i prīca īraudzeit sovu vuordu Baltvilka bolvys nominantu vydā. Lai ari maņ vysvaira interesej taišni bārnu atsauksmis par “Sunānu breiveibā”, vys tik jūmys profesionaļu atzineiba ir cīši svareiga, kab saprostu, ka tys, kū dori, eistyn ir kas lobs i vierteigs. Itei nominaceja dūd lelu ticeibu sev i īdvasmu turpynuot raksteit. Lels paļdis muokslineicai Viviannai Mariai Stanislavskai, gruomotys redaktorei Janai Eglei i projekta vadeituojai Edeitei Laimei, kurys munim spākim nūticēja vēļ tod, kod “Sunāns” beja tik ideja!”

Portalā LSM.lv ir vareiba īsasaisteit skaiteituoju bolsuojumā i izalaseit pošu lobuokū i skaistuokū bārnu voi jaunīšu gruomotu nu itūgod nominātajim dorbim.

Īvārojamuo dobys dzejnīka i bārnu kulturys atbaļsteituoja Jāņa Baltvilka vuordā nūsauktuo vaļsts nūzeimis bolva bārnu i jaunīšu literaturā i gruomotu muokslā itūgod tiks padūta jau 19. reizi. Apbolvuošonys ceremoneja nūtiks 24. julī.