“Latgolys Studentu centrs” sajiems vairuokus Boņukus

Bīdreiba “Latgolys studentu centrs” sajāmuse latgalīšu kulturys goda bolvu “Boņuks” kai aizvadeituo goda lobuokuo latgalīšu sabīriskuo organizaceja, itymā nominacejā bīdreiba bolvu ir sajāmuse jau trešū reizi. Apbolvuojumus īgivuši ari diveji bīdreibys realizātī projekti – latgalīšu kulturys ziņu portals Lakuga.lv i Annys Rancānis dzejūļu kruojums “Pylni kārmani dabasu… Bezdelīgu pasts”.

24. februarī Rēzeknis nūvoda Bieržgalī nūtyka latgalīšu kulturys goda bolvys “Boņuks 2012” bolvu pasnīgšonys ceremoneja. Itūgod bolvys par veikumu latgalīšu kulturā tyka pasnīgtys jau pīktū godu.

Kūpumā bolvai tyka pīsaceiti apmāram diveji symti nūtykumu i personeibu, nu kurom žureja – sovys jūmys specialisti – izaraudzeja lobuokūs sasnīgumus treis lelajuos nominaceju kategorejuos: Sabīdreiba i kultura, Muzyka i Literatura ar gondreiž 30 apakškategorejom. Storp nominantim vairuokuos kategorejuos beja izvierzeita bīdreiba “Latgolys Studentu centrs” i tuos realizātī projekti.

Bonuki

Bolvu kai lobuokais latgalīšu kulturys masu medejs sajiems bīdreibys “Latgolys Studentu centrs” uzturātais latgaliski rokstūšais kulturys ziņu portals Lakuga.lv. Šymā kategorejā portals bolvu sajiems jau ūtrū godu pēc kuortys.

Portalā Lakuga.lv regulari teik īvītuota informaceja par kulturys nūtykumim Latgolā i latgalīšu kulturys aktualitatem i personeibom, tymā teik publicāta jaunuokuo latgalīšu originalliteratura i īvītuotys zinis par jaunumim latgalīšu tradicionalajā i modernaja muzykā. Nu portala izveidis 2007. godā tys ir palics par centralū informacejis olūtu sevkuram interesentam, kas vielejās izzynuot, kas jauns Latgolys i latgalīšu kulturys dzeivē.

Par lobuokū 2012. goda izdavumu tyka atzeits Annys Rancānis dzejūļu kruojums “Pylni kārmani dabasu… Bezdelīgu pasts”, kū bīdreiba laiduse klajā aizvadeituo goda pavasarī. Dzejūļu kruojumā apkūpuoti A. Rancānis dzejūļi obejuos latvīšu volūdys rokstu tradicejuos. Kruojumā īvītuota leidz šam plašuokuo dzejnīcis latgaliski raksteitūs dzejūļu kūpa.

Latgalīšu kulturys goda bolvys “Boņuks” mierkis ir veicynuot latgalīšu tradicionaluos i popularuos kulturys atteisteibu, apkūpojūt aizvadeituo goda lobuokūs veikumus i rūsynojūt kvalitatis i originalitatis pīaugumu latgalīšu kulturā.

 

Informaceju sagataveja

Vineta Vilcāne

Pastuosti cytim!

Leave a Reply

Your email address will not be published.

This site is protected by reCAPTCHA and the Google Privacy Policy and Terms of Service apply.