Latgolā sasateik AIF projektu eistynuotuoji
Pīktdiņ, 12. augustā, i sastdiņ, 13. augustā, Rēzeknē i Preiļūs gasteja nūtyka Aktivūs īdzeivuotuoju fonda (AIF) projektu sasatikšonys pasuokumi, kurā pīsadaleja kai fonda administracejis puorstuovi, tai ari fonda atbaļsteitūs projektu eistynuotuoji.
12. augusta sasatikšonā Rēzeknē, Latgolys viestnīceibā GORS, pīsadaleja ar bīdreibys “LgSC” vadeituoja Edeite Husare. Bīdreiba “LgSC” itūšaļt ir vīns nu AIF kapacitatis projektu eistynuotuoju. Aizvadeituo sasatikšona beja vareiba kai īpasazeit kluotīnē ar fonda puorstuovim, tai pastuosteit par sovu pīredzi i vierzīnim projekta eistynuošonā i jo eipaši vierteigi beja īpasazeit i izzynuot vaira par cytim Latgolys regiona (i na tikai) projektu eistynuotuojim.
Piec sasatikšonys bīdreibys vadeituoja soka: “Loba sajiuta, ka ari Latgolā navaļstiskuos organizacejis grib vysa kuo dareit i, pasasokūt Aktivūs īdzeivuotuoju fondam i donorvaļstu (Norvegeja, Lihtenšteina i Islande) atbolstam, var augt, dorbuotīs i byut stypruokys.”
Sasatikšonys reizē beja vareiba ar AIF puorstuovim izrunuot ari “LgSC” projekta “Bīdreibys “LgSC” kapacitatis styprynuošona piļsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā” eistynuošonys gaitu, naskaidreibys i izaicynuojumus, kab veiksmeigi padareitu aizsuoktū projektu da gola, tai styprynojūt bīdreibys kapacitati i spāku.
__________
Projekts “Bīdreibys “LgSC” kapacitatis styprynuošona piļsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā” teik eistynuots nu 2021. gods 1. maja da 2022. gods 31. oktobra i sajiems atbolstu Aktivūs īdzeivuotuoju fonda kapacitatis projektu konkursā. Projekta finansātuojs ir Islande, Lihtenšteina i Norvegeja.
