Latgalīšu volūda dalykta ari Loesje storptautyskajā plakatu arhivā
Prīceiga viests nu storptautyskuos kusteibys “Loesje” pusis – Eiropys volūdu dīnā, 26. septembrī, Rēzeknē nūtykušuos darbneicys rezultats – plakati ar latgaliskajim tekstim – niu papyldynoj kusteibys storptautiskū plakatu arhivu. Tagad latgalīšu volūda byus 38. pasauļa volūda, kurā daīmami taidi plakati. Plakati kotram grybātuojam daīmami ITE.
Septembrī latgalīšu kulturys kusteiba “Volūda” i organizaceja “Loesje Latvija” Rēzeknē aicynuoja iz rodūšū plakatu tekstu raksteišonu, kas pyrmū reizi storptautyskuos “Loesje” kusteibys viesturē nūtyka latgaliski. Storptautyskuo organizaceja “Loesje” rodusēs 1983. godā Nederlandē, bet niu tei puorstuovāta vaira nakai 25 pasauļa vaļstīs i vaira nakai 15 godu – nu 2006. gods – ari Latvejā, tok viņ niu iz darbeibu, puordūmom voi pasmaideišonu aicynojūšī plakati ir ari latgaliski.
Rodūšuos raksteišonys darbneicā Rēzeknē, izmontojūt “Loesje” tehniku, tuos dalinīkim beja vareiba īpasazeit ar “Loesje” plakatu veiduošonys kusteibu, tuos vierteibom, pīsadaleit vairuokūs rodūšuos raksteišonys īsasiļdeišonys aizdavumūs, kai ari pošim radeit saukļus, kas niu ir tykuši par vysim apsaveramim plakatim.
Darbneicys, kas suocēs ar īvodu latgalīšu rokstu volūdys pamatlītuos i turpynuojās ar rodūšu tekstu raksteišonu, rezultatā par plakatim palyka 22 raksteitī teksti. Tūs vysus niu var apsavērt “Loesje Latvija” arhivā ITE. Nu 14. da 25. novembra plakatus varēja apsavērt Rēzeknis Centralajā bibliotekā, 2024. gods janvarī plānuota izstuode Rēzeknis Tehnologeju akademejā, bet piečuok 2024. godā plānuots pīduovuot apsavieršonai Namaterialuos kulturys centrā “Upīte” i cytuos vītuos.
Plakatu tekstu darbneica ir vīns nu spēlis “Latgalīšu volūdai draudzeiga vīta – ite Rēzekne!” pasuokumu, sovpus spēle ir akcejis “Latgalīšu volūdai draudzeiga vīta” aktivitate. Akcejis, kuru eistynoj latgalīšu kulturys kusteiba “Volūda” i portals lakuga.lv, mierkis ir rūsynuot kasdīnys saziņā vaira izmontuot latgalīšu volūdu, kai ari veicynuot sabīdreibys izpratni par latgalīšu volūdys vierteibu i radeit pozitivu attīksmi pret tū. Akcejis dalinīkus var atpazeit piec eipašu uzleimu ar tekstu “Latgalīšu volūdai draudzeiga vīta”. Vaira dazynuošonai par akceju ITE.
Spēle i cytys “Latgalīšu volūdai draudzeiga vīta – ite Rēzekne!” aktivitatis teik taiseitys ar Rēzeknis vaļstspiļsātys pošvaļdeibys agenturys “Rēzeknis Kulturys i turisma centrs” Mozūs kulturys i turisma projektu konkursa atbolstu. Akceja “Latgalīšu volūdai draudzeiga vīta” ir vīna nu latgalīšu kulturys kusteibys “Volūda” projekta “Latgaliskuos kulturvidis styprynuošona: sabīdreiba, izpratne i īsaiste” aktivitašu, kurys 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
Fotogalerejā: latgaliskī “Loesje” plakati latgalīšu rokstu volūdā, foto Amanda Anusāne
