Jūku gruomota izdūta, aicynojam iz pasuokumu!

Latgalīši vysod bejuši pazeistami na viņ ar sovu sirsneibu, tok ari ar eipašū humora izjiutu. Tū apsazynojūt, bīdreiba “Latgolys Studentu centrs” vaira nakai divejus godus struoduojuse pi latgalīšu jūku gruomotys “Kas bez iuzu – tys bez bādys” izveidis. Tuos prezentacejis pasuokums nūtiks 2. februarī 19 stuņdēs Rībeņu nūvoda Seiļukolna kulturys nomā.

“Kas bez iuzu – tys bez bādys” ir nalela kuldys formata gruomota, kurā apkūpuota latgalīšu myusu dīnu mutvuordu folklora – izteicīni, dažaidys dzeivis gudreibys, jūki, anekdoti, tosti i loba vieliejumi. Itū gruomotu sevkurs varēs izmontuot kai špikeri svātkūs, kod juosoka kaids tosts ci juopaspeid ar kaidu ospruoteibu, ci puorskaiteit kasdīnā. Latgaliskī teksti papyldynuoti ar fotokarteitem i ilustracejom.

Gruomotys idejis autore ir Dagneja Dudarjonoka. Taišni juos vadeibā “Latgolys Studentu centra” jaunīši suoce vuokt anekdotus, izteicīņus, tostus i loba vieliejumus, izvaicojūt rodus, draugus i pazinis. Popularizejūt itū projektu, jau nu 2017. goda tyka reikuotys aktivitatis ar mierki izzynuot nu latgalīšu jūs pīdzeivuotūs smīkleigūs gadīņus.

“Reizem latgalīšu mozī jūceni mejās ar lobu devu sarkasma. Tys atrūnams jau tradicionalajā folklorā – apdzīduošonys dzīsmēs. Atsateista na viņ tehnologejis i volūda, tok ari mutvuordu folklora. Par tū kasdīnā cieški teik lītuoti ari vysaidi aktuali izteicīni. Nazkod ļauds smiejuos, ka vysta nav putyns i buoba nav cylvāks, niule soka: “Opeļs nav mašyna, buoba nav cylvāks!” Nazkod saceja: “Lobuok vāluok nakai nikod!”, niule soka: “Lobuok vāluok nakai vēļ vāluok!”,” stuosta vīna nu gruomotys veiduotuoju Gunta Ločmele.

Gruomotā “Kas bez iuzu – tys bez bādys” sevkurs skaiteituojs varēs īpazeit myusu dīnu mutvuordu folkloru, atrast lobuokū tostu svātkim ci smīkleiguokū atgadīni ci anekdotu, kab uzlobuotu nūskaņuojumu sev i cytim.

Gruomotys izdūšonā finansialu atspaidu snāguse bīdreiba “LR”.

2. februarī Seiļukolna kulturys nomā gruomotys izdevieji aicynoj sevkuru interesentu apmeklēt nanormali nūpītnū i glaunū gruomotys prezentacejis pasuokumu. Pasuokumā ar smīkleigom miniaturom izastuos dažaidi amatirteatri nu tyvuokys i tuoluokys apleicīnis. Eipašu puorsteigumu gatavej ari poši “Latgolys Studentu centra” jaunīši. Pasuokuma laikā byus vareiba ari tikt pi gruomotys. Vokora nūslāgumā varēs izaļustēt balā kūpā ar grupu “Ivarmīns”.

Gruomotu “Kas bez iuzu – tys bez bādys” var nūpierkt gruomotu veikalā “Jānis Roze”, veikalā “Liesma” Rēzeknē, veikalā “O!Marta” Daugovpilī, kai ari internetveikalā taiseitslatgola.lv.

Pastuosti cytim!

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.