Jaunā spēlē aicynojam izzynuot latgalīšu volūdu piļsātvidē Rēzeknē
Latgalīšu kulturys kusteiba “Volūda” i latgalīšu kulturys ziņu portals lakuga.lv aicynoj pīsadaleit latgalīšu volūdys i tai draudzeigūs vītu izzynuošonys spēlē Rēzeknē. Spēlē “Latgalīšu volūdai draudzeiga vīta – ite Rēzekne!”, kurā, izīmūt maršrutu pa 13 latgalīšu volūdai draudzeigom vītom, da 14. oktobra var pīsadaleit kotrys grybātuojs – kai rēzeknīši, tai piļsātys gosti.
Jaunajā maršrutā-spēlē var pīsadaleit vysi interesenti nu sevkurys Latvejis (i cytys pasauļa) vītys, kuri da 14. oktobra izīs maršrutu i pagasteis 13 “Latgalīšu volūdai draudzeiga vīta – ite Rēzekne!” spēlis vītuos Rēzeknē, īpazeistūt vītys, atbiļdūt iz vaicuojumim i padorūt vysaidus aizdavumus. Maršrutā īkļautuos vītys ir vysaidys – spēle suocās pi Latgolys kulturviesturis muzeja, bet spēlis uzleimis ar ospruoteigim izteicīnim i QR kodim, kas aizvad iz spēlis suokumu, atrūnamys i pi cytu spēlis daleibnīku. Spēlis maršrutā īkļauti ari Latgolys viestnīceiba “Gors”, Rēzeknis Zaļuo sinagoga, Rancāna pogolms ar “KUUP Coffee” i “Ausmeņa kebabs”, gruomatneica “Liesma”, zūbuorstnīceiba “ZŪBS”, Rēzeknis Tehnologeju akademeja, Latvejis Radejis Latgolys studeja i cytys vaira i mozuok zynomys latgaliskuos vītys piļsātā.
“Latgalīšu volūdai draudzeiga vīta – ite Rēzekne!” ir taiseita tai, kab tū bezmoksys varātu izīt sevkurā laikā naatkareigi nu maršrutā īkļautūs vītu dorbalaika, taipat spālātuojim ir sagataveiti vairuoki puorsteigumi – eipašūs akceju voi spēlis suveniru veidā. Vyss, kas spālātuojim vajadzeigs – mobilais telepons ar škārsteiklu i kameru, gataveiba īt 5 km i tam veļteit 1,5–2 stuņdis laika. Ka spālātuoji gryb pagasteit ari maršrutā īkļautajuos vītuos vydā, tod vālams spēlis laiku pīmāruot vītu dorbalaikam. Itys maršruts ir ari vīns nu veidu, kai piļsātys gostim īpazeit Rēzekni.
Spēlis maršruta sastateituoja i “Volūda” puorstuove Amanda Anusāne soka: “Ar itū spēli vaira gribim dagrīzt viereibys latgaliskajam Rēzeknē – kab tū vaira kasdīnā īrauga vītejī dzeivuotuoji, kai ari izzynoj gosti nu cytu vītu. Saīt jau tai drupeit naizprūtami, ka myusdīnuos pošā Latgolā juomeklej, kur tod latgalīšu volūda pasaruoda vidē i skaņ, jo dīvamžāļ niu na vysur tys ir pošsaprūtama kasdīna, tok Rēzeknē tys ir i vēļ vysā daudzi. Prīca, ka ari uzjāmumi i organizacejis rauga latgalīšu volūdu izmontuot sovā vizualajā komunikacejā voi dorbūs. Vysys Rēzeknis latgaliskuos vītys vīnā maršrutā nimoz navar salikt, bet itū spēli var uztvert kai pyrmū sūli i par puorejū pošim pasainteresēt vaira!”
Vosorā i rudinī spēlis laikā interesenti teik aicynuoti ari iz vairuokim pasuokumim Rēzeknē, kurūs vēļ vaira varēs izzynuot latgaliskū Rēzeknē voi pošu latgalīšu volūdu. Pasuokumi byus:
- 27.07.2023. Puorguojīņs ar naformalū piļsātys izzynuotuoju apvīneibu “Nezināmā Rēzekne”;
- 19.08.2023. Velobraucīņs i grafiti zeimuošonys paraugdemonstriejums ar Valteru Murānu (“Ausmeņa Records”);
- 26.09.2023. Latgalīšu rokstu volūdys nūdarbeiba i latgaliskūs plakatu meistarklase;
- 14.10.2023. Spēlis nūslāguma pasuokums ar latgalīšu volūdys diktatu i koncertu.
Spēlis nūslāguma pasuokumā 14. oktobrī Rēzeknē spēlis daleibnīkim byus vareiba sajimt bolvys nu akcejis organizatorim i sadarbeibys partnerim. Spēlē byus vareiba pīsadaleit sevkuram interesentam, ari nasaregistrejūt i naapstyprynojūt sovu pīsadaleišonu. Taipat latgaliskais maršruts byus izīmams ari piec spēlis termeņa beigu 14.10.2023., jo spēle i informativuos nūruodis byus daīmamys piļsātvidē naīrūbežuotā laikā kai izzynojūšs i izgleitojūšs pasuokums i materials.
Maršruta atkluošonā Rēzeknē 16. junī kluotyn beja ari maršrutā īkļautūs vītu puorstuovi, sadarbeibys partneri i jaunīšu programys “LTG tu dū!” daleibnīki, kūpā izīmūt spēlis maršrutu. Pasuokuma daleibnīkim beja vareiba atbiļdēt na viņ iz maršrutā īkļautajim vaicuojumim i piļdeit aizdavumus, bet ari papyldu beja sagataveiti golda spēlis “Čipierkstneits” vaicuojumi, iz kurim vysu vaira pareizi atbiļdēja i spēlis bolvu sajēme Latgolys Kulturviesturis muzeja puorstuove Renāte Ničiporčika.
Spēle “Latgalīšu volūdai draudzeiga vīta – ite Rēzekne!” ir vīna nu akcejis “Latgalīšu volūdai draudzeiga vīta” aktivitašu. Akcejis, kuru reikoj latgalīšu kulturys kusteiba “Volūda” i portals lakuga.lv, mierkis ir mudynuot kasdīnys saziņā vaira izmontuot latgalīšu volūdu, kai ari veicynuot sabīdreibys izpratni par latgalīšu volūdys vierteibu i radeit pozitivu atsatīkšonu pret tū. Akcejis daleibnīkus var atpazeit piec eipašu akcejis uzleimu. Vaira informacejis par spēli ite: https://www.lakuga.lv/ltgdraudzeigs-rezekne/, bet par akceju ite: https://www.lakuga.lv/ltg-vita/.
Ka ari cytys piļsātys Latgolā voi cytur Latvejā (jo kotrā piļsātā var atrast kaidus latgaliskūs pādus) gryb leidzeigu spēli cytai sezonai sataiseit pi seve, latgalīšu kulturys kusteiba “Volūda” aicynoj drūsai sasazynuot, rokstūt lgsc@lgsc.lv.
“Latgalīšu volūdai draudzeiga vīta – ite Rēzekne!” informativi atbolsta Latgolys Turisma asociaceja, bet spēle i tuos aktivitatis teik reikuotys ar Rēzeknis vaļstspiļsātys pošvaļdeibys agenturys “Rēzeknis Kulturys i turisma centrs” Mozū kulturys i turisma projektu konkursa atbolstu. Akceja “Latgalīšu volūdai draudzeiga vīta” ir vīna nu latgalīšu kulturys kusteibys “Volūda” projekta “Latgaliskuos kulturvidis styprynuošona: sabīdreiba, izpratne i īsaiste” aktivitašu, kurys 2023. i 2024. godā atbolsta Sabīdreibys integracejis fonds nu Kulturys ministrejis daškiertajim Latvejis vaļsts budžeta leidzeklim.
Fotogalerejā spēlis atkluošonys pasuokums Rēzeknē, foto Amanda Anusāne.
