Izīs komiksu gruomota bārnim “Sunāns breiveibā”
Cyta gods suokumā latgalīšu kulturys kusteiba “Volūda” izdūs Laurys Melnis i muokslineicys Viviannys Mariis Stanislavskys pyrmū kūpeigū dorbu – komiksu gruomotu bārnim latgaliski “Sunāns breiveibā”. Gruomota byus stuosts par suni, kura vuords ir Sunāns, i juo dzeivi, puorsaceļūt nu piļsātys iz laukim.
Laura Melne ir latgalīšu kulturys ziņu portala redaktore, kai uorštata autore roksta i rakstejuse ari žurnalim “A12”, “I’m perfect”, portalim retv.lv, kroders.lv i cytim, kai ari ir korektore i literaruo redaktore cytu autoru dorbim. Komikss “Sunāns breiveibā” ir Laurys debejis dorbs pošai kai gruomotys autorei.
Ideja par komiksa tipa gruomotu, kas ir pyrmuo taida bārnim latgaliski, Laurai rodusēs sarunuos ar pīredzejušū gruomotu muokslineicu Viviannu Mariu Stanislavsku. “Pasaulī tys ir populars žanrys, nu Latvejā nazkai nav tik populars, muokslineicai tys pasadūd i ruodejuos, ka komikss varātu byut lobs veids, kai raudzeit paleidzēt īpazeit latgalīšu volūdu cylvākim, kuri cytaiž gruomotu latgaliski varbyut i naizavālātu,” par gruomotys formata ideju soka Laura Melne.
Gruomotys redaktore ir literate Jana Egle, bet izdeviejs – latgalīšu kulturys kusteiba “Volūda” (bīdreiba “LgSC”).
Komiksa golvonais varūņs ir suņs vuordā Sunāns, kurs saiminīku dzeivisvītys mainis deļ byus spīsts puormeit sev īrostū piļsātys vidi iz Latgolys laukim. Tī jam byus juosavuica sadzeivuot kai ar dabuotū breiveibū, tai saimisteibys sorgu da ituo – kači. Gruomota dūs vareibu bārnim īpasazeit kai ar myusu dīnu piļsātys, tai lauku dzeivi, mudynuos byut drūsmeigim i sovā vydā draudzeigim.
“Sunāns breiveibā” izīs 300 eksemplaru tiražā, nu kurys daļa tiks paduovynuota ari bibliotekom i školom Latgolā, kai ari byus jauns latgalīšu literaturys publicitatis materials. Bet jau niu kotram grybātuojam ir vareiba sev rezervēt gruomotys eksemplaru īprīškpuordūšonā latgalīšu kulturys kusteibys “Volūda” zīduojumu platformā-veikalā ite: http://www.voluda.lv/pierkt/item/gruomotys/sunans-breiveiba/
Gruomotys izdūšonu atbaļstejuse Vaļsts kulturkapitala fonda Latgolys kulturys programa, kurū eistynoj Latgolys regiona atteisteibys agentura, bet finansiali atbolsta A/S “Latvijas valsts meži”.
