Byus jauna golda spēle latgaliski – “Čipierkstneits”

Byus jauna golda spēle latgaliski – “Čipierkstneits”

Janvarī interesentim byus daīmama golda spēle latgaliski “Čipierkstneits”, kas ir pyrmuo itaida veida – zynuošonu, aizdavumu, atjauteibys i ari veiksmis – spēle latgaliski. Spēlis autore ir Jolanta Keiša, kurys dzymtuo puse ir Bolvu nūvoda Šķilbāni, bet pi tuos izdūšonys tolkā guojušys bīdreibys “Upītes jauniešu folkloras kopa” i latgalīšu kulturys kusteiba “Volūda”.

Jolanta Keiša piec izgleiteibys ir filologe i dizainere, bet ideja par golda spēli latgaliski jai roduos 2021. godā kai studeju dorbs. Jolanta ir spēlis idejis, satura i dizaina autore, bet kai redaktore paleidzējuse Edeite Husare nu latgalīšu kulturys kusteibys “Volūda”. Iz spēlis laukuma izlyktus dažaidys myusdīnu i senejuoku laiku Latgolys kulturys vierteibys – kai objekti, tai ļauds, pamatūt līceibys par Latgolys dažaidū kulturviesturi.

Spēlis nūsaukuma “Čipierkstneits” ideja pajimta nu literata, folklorista, nūvodpietnīka i latgalīšu sabīdryskuo darbinīka Ontona Slišāna dailradis – tys ir četrūs pierstūs pajemams daudzums, latvīšu literarajā volūdā – šķipsniņa. Taida i ir spēlis ideja – čipierkstneits latgaliskuma, zynuošonu, informacejis i sajiutys kūpā ar spēlis bīdrim. “Tys muns davums Latgolai ar itū spēli ari ir tuods kuo čipierkstneits – četrūs pierstūs pajemams lelums, gabaleņš Latgolas. Mes tū spēles kauleņu varim pajimt četrūs pierstūs, čipierkstneitī, izsūļuot spēli i dabuot kuodas zynuošonas, pajimt gobolu Latgolas sev,” par spēlis ideju stuosta Jolanta Keiša.

Vīns nu spēlis golvonūs nūsacejumu ir skaiteit vysus spēlis tekstus latgaliski, kab volūda skanātu i jei tiktu lītuota. Tim, kuri gryb izzynuot vaira par Latgolu, nu latgaliski cikom cik labi najādz, vysim tekstim ir daīmams ari puorlykums latvīšu literarajā volūdā. Spēlei ir diveji varianti – vīnkuoršuokais ar mierki, svīžūt kauleņu i sekojūt nūsacejumim, pyrmajam tikt da spēlis gola, bet ūtrys – papyldynuots ar 120 spēlis kartom, iz kuru ir dažaidi aizdavumi i nūsacejumi, kas voda spēlis procesu. Spēle byus pīmāruota vīnlaiceigai spieliešonai 2 da 8 spālātuojim dažaidūs vacumūs. Īprīškeja sasagataveišona nav navajadzeiga, bet, ka byus kaidys zynuošonys par Latgolys kulturviesturi, tuos var nūderēt. Taipat spēle varātu byut lobs paleigleidzeklis ari vuiceibu stuņdēs i uorpusstuņžu nūdarbeibuos, kur vaira teik izzynuota Latgola.

“Čipierkstneiša” redaktore i latgalīšu kulturys kusteibys “Volūda” vadeituoja Edeite Husare par sadarbeibu spēlis tapšonā soka: “Spēlis eistynuošonā tuos autore Jolanta ir dalykuse cīši lelu dorbu, deļtuo prīcojamīs, ka kūpā ar “Upītes jaunīšu folklorys kūpu” i “Volūdu” varim paleidzēt eistynuot itū Jolantys sapynu par gotovu spēli! Ar Jolantu īpasazynom, kod jei 2021. goda golā guoja pi myusu praksi, studejūt Latvejis Kulturys koledžā, i taišni tod ari aizasuoce dorbs pi spēlis idejis. Prīca, ka beja vareiba īt tolkā i atbaļsteit jaunys idejis latgaliskajā kulturā.”

Paradzāts, ka janvarī byus ari spēlis prezentacejis nūtikšona, reikojūt “Čipierkstneiša” čempionatu Bolvu nūvodā.

Sekuot leidza Jolantys stuostim par spēli var ari spēlis profilā socialajā teiklā Instagram.com/cipierkstneits.

Spēle cikom izīs viņ 100 eksemplaru tiražā, nu kurūs 70 tapuši ar Vaļsts kulturkapitala fonda Latgolys kulturys programys atbolstu i leluokuo daļa nu tuos tiks izmontuoti kai Latgolys prezentacejis materiali, paduovynojūt ari bibliotekom, školom i organizacejom. Īrūbežuots spēlis eksemplaru skaits byus daīmams ari tierdznīceibā – jau niu pasyuteit spēlis eksemplaru sev var īprīškpuordūšonā ite: http://www.voluda.lv/pierkt/item/cyti/cipierkstneits-golda-spele-latgaliski/

Pastuosti cytim!

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.