Izīs emoceju puosoku gruomota latgaliski “Kai palikt par eistynu luoci”
Kūpā ar bārnim vuicūtīs emoceju saprasšonu i turpynojūt izzynuot luocāna Meikuleņa pīdzeivuojumus, izīs Meldrys Gailānis i muokslineicys Līgys Mundys gruomota saimem i bārnim “Kai palikt par eistynu luoci”. Jaunajā izdavumā sešuos emoceju puosokuos i aizdavumūs kai bārni, tai pīaugušī varēs izzynuot vaira par emocejom, luocānu Meikuleņu i juo draugim.
Stuostus par luocānu bibliotekare, literate i pīcu bārnu mama Meldra Gailāne roksta jau vaira nakai 20 godu. Jī pi Meldrys atguojuši reizē ar pleiša luocānu, kas kai bolva kaidā konkursā sovulaik pi saimis tics, atbraucūt nu Reigys. Luocāns, kuru suokuos sauce par Mikī i Mikiju, dzeivojūt Latgolā, palyka par Meikuleņu. Pyrmū reizi Meikuleņa (voi tūlaik vēļ Mikija) pīdzeivuojumus pasauļs izzynuoja 2012. godā izdūtajā gruomotā “Mikijs un viņa draugi”, bet 2018. godā izguojušajā gruomotā “Meikuleņš īpazeist omotus” luocāna pīdzeivuojumi turpynojās jau kai Meikuleņam, izzynojūt vysaidus omotus — ausšonu, izšyušonu, klyugu peišonu i cytus.
Jaunajā izdavumā “Kai palikt par eistynu luoci” kūpā ar luocānu Meikuleņu i juo draugim – meitineiti Martu, začineiti Pūdzeņu, ezeiti Pukšynu i cytim — muozī i lelī skaiteituoji sešuos puosokuos varēs īpazeit emocejis – naticeibu sev, augstpruoteibu, sirdeigumu, baili, skumi i prīcu, kai ari rībumu pret cytaidū. Kotrai puosokai kluotyn ir socialuos pedagogis Laurys Mičulis-Šustis sagataveiti aizdavumi, kurī emocejis paleidzēs saprast vēļ lobuok. Taipat, kab vīgluoka skaiteišona, gruomota papyldynuota ar gryutuokūs vuordu skaidruojumim latvīšu literarajā volūdā. Puosokys i aizdavumus papyldynoj muokslineicys Līgys Mundys kruosainuos ilustracejis.
Gruomotys “Kai palikt par eistynu luoci” mierkauditoreja ir bārni pyrma školys i suokumškolys vacumā, jūs vacuoki, vacvacuoki, školuotuoji, kai i cyti pīaugušī, kurī dorbojās ar bārnim i kūpā grib paleidzēt lobuok saprast emocejis, kai ari reizē vaira runuot latgaliski saimē, školā voi cytā vidē. Izdavuma redaktore ir Ilze Sperga, ar korekturu tolkā guojuse Muora Mortuzāne-Muravska, projekta vadeituoja — Edeite Laime.
Puosoku autore Meldra Gailāne ir roksta kai prozu i dzeju, tai i lugys, juos dorbu auditoreja ir kai bārni, tai pīaugušī, kasdīnā struodoj Rēzeknis vaļstspiļsātys Bārnu bibliotekā, studej biblioteku zyneibys, aizaraun ar stuostnīceibu i ir drūsuoka škārsteikla viestneica Latgolā. Muokslineica Līga Munda absolvējuse interjera dizaina programu Rēzeknis Tehnologeju akademejā, bet kasdīnā struodoj floristikys sferā.
Izdavumu saimem i bārnim “Kai palikt par eistynu luoci” izdavuse latgalīšu kulturys kusteiba “Volūda” (bīdreiba “LgSC”), bet jis izdūts ar Vaļsts kulturkapitala fonda mierkprogramys „Latvīšu viesturyskūs zemu atteisteibys programys“ finansialu atbolstu. Programu Latgolā administrej Latgolys regiona atteisteibys agentura.
