Izdūts latgalīšu dzīšmu kruojums “Muna dzīšmu gruomota”

Bīdreiba “Latgolys Studentu centrs” februara beiguos izdavuse seņ īcarātu gruomotu – da ituo apjūmeiguokū latgalīšu dzīšmu kruojumu “Muna dzīšmu gruomota”, jamā apkūpuotys 300 dzīsmis latgaliski – i tautysdzīsmis, i autordzīsmis, kurys aptver ap 100 godu ilgu periodu – nu 20. g. s. suoku da pat 2019. gods ūtrai pusei.

Dzīšmu kruojumā “Muna dzīšmu gruomota” apkūpuotys 120 vysaidu Latgolys vītu tautysdzīsmis (jūs vydā ari Sibira latgalīšu dzīsmis) i 180 vysaidu laiku autoru dzīsmis latgaliski – nu jūs daīmami i vuordi, i nūtis, i ari akordi. Tikai nalelai dzīšmu daļai da ituo bejs nūšu pīroksts, partū jaunais izdavums jau ir ar viesturisku vierteibu – dūdūt dzīsmem vareibu sasaglobuot na viņ audio versejuos kaidūs muzykys nesiejūs ci digitali (pitam tī nav daīmami vysom dzīsmem), bet ari plaši lītojamajā nūšu rokstā. Ka da ituo bejuši izdūti atseviški latgalīšu tautysdzīšmu kruojumi i daži pošu dzīšmu autoru dzīšmu nūšu apkūpuojumi, “Muna dzīšmu gruomota” ir vysplašuokuo i apjūmeiguokuo retrospekceja par latgalīšu dzīšmu materiala dažaideibu, kaida vyspuor ir tykuse izdūta.

Ideja par kruojumu bīdreibai “Lagolys Studentu centrs” rodusīs jau apmāram pyrma desmit godu, tok dzīšmu savuokšona i materiala sagataveišona publiciešonai izaruodeja cīš apjūmeigs dorbs. Kruojuma sastuodeituoja i izdūšonys dorbu vadeituoja ir E. Husare, muokslineica Daina Salmiņa, bet nūtīs leluokū daļu dzīšmu materiala īmyužynuojuse Solvita Ivanova.

Prīcuodamuos par padareitū dorbu, kruojuma sastuodeituoja E. Husare soka:

“Kruojumā aptvartū dzīšmu materialu varātu raksturuot kai nu “Auga, auga rūžeņa” da “Jis i jī, kam nav bolsa” radeitajam skaņdorbam “Donats” ci kai cīš plašu žanru dažaideibā. Izdavuma mierkis ir popularizēt dzīduošonu latgaliski i saimis svātkūs, naformalūs pasuokumūs, i ari byut kai materialam publiskūs pasuokumu programu gataveišonai, izmontuošonai školuos i cytur. Muns sapyns ir, ka mes poši i Latgolā, i cytur pasaulī dzīžam latgaliski koč par mozu drupeiti vairuok nakai tū dorom itūšaļt.”

Savutīs nūšu materiala veiduotuoja Solvita Ivanova aicynoj pošus muzikus palikt na viņ pi koncertizpiļdejuma i dzīšmu īrokstu vysaidūs audio formatūs, bet ari īmyužynuot nūšu rokstā, kas dūd leluoku īspiejameibu dzīsmei sasaglobuot daīmamai i tehniski saprūtamai ari turpmuokajom paaudzem.

Svineiguo latgalīšu dzīšmu kruojuma “Muna dzīšmu gruomota” īdzīduošona nūtiks 25. aprelī Latgolys viestnīceibā GORS pyrma dzejneicai Annai Rancānei veļteituo koncertuzvaduma “Latgolys freska” pyrmizruodis. Taipat gruomotai i latgalīšu dzīšmu populariziešonai ir izveiduota socialuo teikla “Facebook.com” lopa facebook.com/dziisme, kurā tiks publicāti plašuoki stuosti i ari audio materials par kruojumā īkļautajom dzīsmem. Nuokūtnē plānuots izdūtū materialu padareit daīmamu ari kaida digitaluo rysynuojuma veidā. Gruomotu sevkurs interesents var īsaguoduot latgalīšu gruomotu internetveikalā taiseitslatgola.lv, taipat jei byus daīmama gruomatneicuos vysā Latvejā. Itamā nedelis nūgalē tū var izdareit ari Latvejis Gruomotu izstuodē Kīpsalā latgalīšu gruomotu goldā.

Dzīšmu kruojuma izdūšonu atbaļstejuse Vaļsts kulturkapitala fonda Latgolys kulturys programa ar AS “Latvijas valsts meži” i Latgolys regiona atteisteibys agenturys atbolstu.

Pastuosti cytim!

Leave a Reply

Your email address will not be published. Required fields are marked *