Gruomotu svātki aizvadeiti

Nu 5. leidz 7. novembrim Reigā Kongresu nomā nūtyka tradicionalī Reigys Gruomotu svātki, kurūs pyrmū reizi pīsadaleja ari bīdreiba “Latgolys Studentu centrs”, pīduovojūt īspieju interesentim īsaguoduot dažaidu latgalīšu izdevieju gruomotys i audio īrokstus.

Paraleli gruomotu tierguošonai treju dīnu garumā, Gruomotu svātkūs nūtyka plaša kulturys programma, kurā pīsadaleja ari “Latgolys Studentu centrs”, 6. novembra vokorā reikojūt latgalīšu literaturys skaitiejumu pasuokumu – “Latgalīšu dzeja, proza i muzyka cytūs godalaikūs”, kas beja pyrmais pasuocīņs zam “Vāluo rudiņa” zeimis paradzātajā literarūs skaitiejumu cyklā “Cyti godalaiki”.

Latgalīšu literaturys skaitiejumu pasuocīņs giva nasarātu atsauceibu i nu paradzātuos auditorejis pyrma pasuocīņa nuocuos puorsaceļt iz Kongresu noma mozū zalu, bet itei naierteiba ir vysu leluokais gandariejums par iņteresi kū raiseja latgalīšu literatura i muzyka. Ari Gruomotu svātku Kulturys programmys organizatori prīcojuos par atsauceibu i komentēja: “Mes tak zynuojom, ka latgalīšim iz reizis vādzeja jimt leluoku telpu!”

Ar sovim dorbim klauseituojus “Vālajā rudinī” prīceja Ontons Slišāns, kam itūgod izguojs eseju kruojums “Čipierksneits”, Valentins Lukaševičs, kas sagataviejs izdūšonai jaunu aiļu kruojumu, Raibīs Suņs, kas dreižumā izdūs prozys kruojumu “Pyrma syltī”, kai ari Juoņs Ryučāns  i Ilze Sperga. Muzykali literarūs skaitiejumus ar zynomom i mozuok dzierdātom dzīsmem papildynuoja Verners Martinovs nu grupys “Restauratori” i Guntis Rasims nu grupys “Bez PVN”. Taipat klauseituoji tyka īpazeistynuoti ari pādejuo laika aktualitati latgalīšu kulturys dzeivē – puorsokom. Ivars Magazeinis (Juoņs Ryučāns) pastuostieja par gruomotu “Feimaņu draudzes pasakas”, bet Guntis Rasims par itūgod izguojušū audio disku – “Latgalīšu puorsokys i puosokys”. Ar puorsoku skaitiejumim nu diskā īkļautajom puorsokom prīcieja Juris Viļums, Raibīs Suņs, Guntis Rasims, Edīte Husare i Aigars Runčis.

Bīdreiba “Latgolys Studentu centrs” pasateic par iņteresi i atbolstu ituo pasuocīņa nūrisē i pi laika jau aicynoj iz tuoluokajim cykla “Cyti godalaiki” latgalīšu literaturys i muzykys pasuocīnim Reigā – “Dziļuo zīma” janvarī i “Agrais pavasars” martā.

Edeite

Foto – Inese Krivmane

PS Broņislava Srpydzāna raidiejums par pasuocīni:
http://www.lakuga.lv/lg/news/article?id=4338

Pastuosti cytim!

2 Replies to “Gruomotu svātki aizvadeiti”

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.