Daugovpilī LgSC vuicejuos latgalīšu rokstu volūdu
Bīdreiba „Latgolys Studentu centrs” (LgSC) 16.febralī Daugovpilī vysus interesentus aicynuoja iz latgalīšu rokstu volūdys apvuiceibu „Vuiceisimēs latgalīšu rokstu volūdu vīnuvīt”. 
Lai dareitu sovu miseju – saglobuotu, popularizātu i atteisteitu latgaliskuos kulturys vierteibys, tūstorp latgalīšu rokstu volūdu, LgSC periodiski roksta projektus, reikoj pasuokumus, izdūd gruomotys latgalīšu rokstu volūdā. Itū reizi LgSC Daugovpiļs nūdalis studenti pārnejuo gods decembrī saraksteja projektu „Vuiceisimēs latgalīšu rokstu volūdu”. LgSC ar sovu projektu pīsadaleja LR Kulturys ministrejis izsludynuotajā konkursā „Integracejis pasuocīni 2011” i sajieme finansialu atbolstu projekta realiziešonai.
Projekta mierkis ir paplašynuot latgalīšu rokstu volūdys pratieju lūku jaunīšu vydā, veicynuot jaunīšu interesi par regionalū kulturu, rūsynuot sevkuru izmontuot latgalīšu volūdu na viņ mutvuordu saziņā, bet ari rokstūs.
Vīns nu projekta aizdavumim beja sareikuot latgalīšu rokstu volūdys apvuiceibu „Vuiceisimēs latgalīšu rokstu volūdu vīnuvīt” Daugovpiļs Universitatis studentim. Lai sataiseitu apvuiceibu, projekta dorba grupa – studentis Dagneja Bramane, Zaiga Lāce, Eva Kasparenoka i pīaicynuotī eksperti volūdys vaicuojumūs Valentins Lukaševics, Ivars Juoņs Magazeiņs – īprīkš struoduoja pi apvuiceibys modeļa taiseišonys.
Lai sataiseitu jaunu apvuiceibu koncepceju (modeli), vysu pyrma projekta dorba grupa salaseja informaceju i aizsnādzamūs materialus par latgalīšu rokstu volūdu, ortagrafejis nūsacejumim, appraseja latgalīšu rokstu volūdys vuiceituoju redziejumu, apzynuoja jaunīšu vysvaira pīlaistuos klaidys.
Apvuiceiba LgSC bīdrim, interesentim i cytim DU studentim beja taids kai eksperiments, izmieginuojums, lai izzynuotu pošu jaunīšu dūmys par latgalīšu rokstu volūdu, vuiceišonuos īspiejom, izdalis materialu saturiskū i vizualū informaceju.
Apvuiceibys īsasuoce ar nalelu īvodu i vyspuoreigom temom par latgalīšu rokstu volūdu. Tuoļuok studenti vuicejuos „e”, „ē” izrunu i raksteibu, leidzskaņu meikstynuošonu, atgrīzeniskūs darbeibys vuordu raksteišonu, burtu: o, ō, uo, i, y raksteišonu i c. Apvuiceibys pasamejūt vadeja Valentins Lukaševičs i Ivars Juoņs Magazeiņs.
Piec apvuiceibom nūtyka diskuseja par latgalīšu rokstu volūdys, ortografejis nūsacejumim i cytim ar apvuiceibu saisteitajim vaicojumim.
Īguodojūt studentu redziejumu, projekta dorba grupa iz prīšku struoduos pi apvuiceibys modeļa izlobuošonys, lai martā jau varātu vuiceitīs latgalīšu rokstu volūdu kūpā ar Latgolys školu bārnim.
