Diskusejis “Šudiņ vakareņuos “Latgolys zylūņs”!” video i audio īroksts
10. junī Ciesīs, sarunu festivalā LAMPA”, “British Council” atbaļsteitajā Regionu skotivē iz pasuokumu “Šudiņ vakareņuos “Latgolys zylūņs”!” aicynuoja ari Latvejis Radejis Latgolys studeja, latgalīšu kulturys kusteiba “Volūda” i bīdreiba “New East”. Diskuseju varēja pīdzeivuot na viņ iz vītys festivalā, bet ari niu kai Latvejis Radejis Latgolys studejis LR1 Latgolys apraidē skonūšū raidejumu “Latgolys stuņde”.
„Latgolys zylūņs” – problemys, par kurom sabīdreibā ir zynoms, tok šaļtim ir beišonuos runuot skali voi nūsaukt vuordā. Bīži par tom nateik runuots nimoz voi tuos pasaruoda viņ kaidā konkretā šaļtī, par pīmāru, eisi piec Saeimys vieliešonu, kod tūs rezultats Latgolā otkon izaruoda kai puorsteigums Latvejā.
Sarunu festivalā LAMPA iz Regionu skotives vakareņuos pi Latgolā īrostuo garuo golda ar treis kuortu “iedīnim”, kurymā kotrys ir kaida problema – kaida “Latgolys zylūņa” daļa, par kurū dūmojūt, diskutejūt i rysynojūt, varātu tikt da kūpeiguos lobuokuos receptis, kai ar tū tikt golā, kai tū “apēst”, dasadalēja 14. Saeimys deputate Anna Rancāne, vīglatlete Gunta Vaičule, zemnīku saimisteibys “Amatnieki”/”Riekstiņi” puorstuovs Elvis Bartkevičs, bīdreibys “New East” vadeituojs Jorens Dobkevičs, Latvejis Bankys ekonomists Olegs Krasnopjorovs i raidejuma “Bez Tabu” žurnalists Roberts Blass. Vakareņis, kur “iedīņu” statusā beja Latgolys informativuo telpa, jaunīšu īspiejas, biznesa vide i cyti Latgolai svareigi vaicuojumi, vadieja kinys “Daugavpils – iespēju vai nespēju pilsēta?” veiduotuoja Vladislava Romanova i radejis personeiba Lauris Zalāns.
Diskusejis īrokstu video formatā var nūsavērt ite:
Audio formatā diskuseja skaņ ite:
Diskusejis īspaidā topa ari Latvejis Bankys ekonomista Olega Krasnopjorova bloga īroksts par Latgolys ekonomiskū situaceju Latvejis Bankys uzturātajā ekonomiskuos analizis vītnē makroekonomika.lv.
“Šudiņ vakareņuos “Latgolys zylūņs!”” ir ari vīna nu latgalīšu kulturys kusteibys “Volūda” (bīdreibys “LgSC”) projekta “Latgaliskuos kulturvidis styprynuošona: sadarbeiba, izpratne i īsaiste” aktivitašu, kuru 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
Fotogalerejā: diskuseja “Šudiņ vakareņuos “Latgolys zylūņs”!”, foto Edeite Laime
