Cyblys jaunīši i Lauris Zalāns sasateik sarunā ap latgalīšu volūdu
Vosorā latgalīšu kulturys kusteiba “Volūda”, Latvejis Nacionalais kulturys centrs i Latvejis Universitatis (LU) Lībīšu instituts izsludynuoja fotokonkursu “PieZīmes/PīZeimis/JūrõTǟtõkst”, kurā interesenti tyka aicynuoti īmyužynuot jaunuos latvīšu viesturyskūs zemu rūbežu i latgalīšu rokstu i lībīšu volūdā izlyktuos vītvuordu zeimis. Vīni nu aktivuokūs konkursa dalinīku beja Cyblys pamatškolys školāni, deļtuo “Volūda” aicynuoja školānus iz sasatikšonu-sarunu par latgalīšu volūdu ar radejis personeibu, latgalīti Lauri Zalānu.
Cyblys pamatškolys školāni i školuotuoja Dzintra Toporkova fotokonkursā pīsadaleja ar vairuokom biļdem. Latgalīšu rokstu volūdys puļceņa jaunuokuos grupys daleibnīki nūdarbeibu laikā izbrauce ekskursejā iz tyvejom sādžom, kas atsarūn Cyblys apleicīnē. Ekskursejis mierkis – pīsadolūt fotokonkursā, izzynuot, kaidys sādžys agruok beja apdzeivuotys, cik muoju tamuos sādžos ir tagad, voi kaids nu školys bīdru tī dzeivoj, i kai latgaliski pīroksta sādžu nūsaukumus. Pavysam kūpā tyka izbrauktys sešys sādžys: Čižyki, Vacumnīki, Luopsti, Barysi, Kaļveiši, Stuocynova.
Latgalīšu rokstu volūdys puļceņa vacuokuos grupys daleibnīki nūdarbeibu laikā devēs puorguojīnī iz tyvuokū sādžu Morozouku ar mierki pīsadaleit fotokonkursā i izzynuot nu sādžys īdzeivuotuoju, parkū radīs taids nūsaukums. Pyrms tam nūdarbeibā tyka skaiteits, izzynuots i pīraksteits, kur Cyblys nūvodā tyka izvītuotys dzerauņu vītvuordu zeimis latgalīšu volūdā.
Bet školuotuojis audzynomuo klase puorguojīņa dīnā izzynuoja Cyblys viesturi, kai radīs Cyblys nūsaukums, kai laika gaitā vītys nūsaukumi ir mainejušīs, kas tū ītekmēja.
Fotokonkursā pīsadaleja ari influencers, radejis personeiba i pasuokumu vadeituojs Lauris Zalāns, deļtuo latgalīšu kulturys kusteibai “Volūda” roduos ideja, lai styprynuotu jaunīšu interesi par latgaliskū, izzynuotu vaira par latgalīšu volūdu i juos īspiejom, sareikuot Laura i Cyblys pamatškolys školānu sasatikšonu – sarunu par volūdu i myusu dīnu jaunīšim svareigom temom. Gastejūt Cyblā, Lauris Zalāns pastuosteja par latgalīšu volūdys nūzeimi juo dzeivē, cik nūdereiga tei ir bejuse, i ar kaidim izaicynuojumim ir daguojs sasatikt, kai volūda styprynuojuse juo identitati i ītekmiejuse juo personeibys i profesionaluos karjerys izaugsmi. Eipaši lela jaunīšu interese beja par Laura dorbuošonūs socialūs teiklūs i satura veiduošonu, i kai tys ir ītekmiejs juo dzeivis ceļu.
Paļdis jaunīšim par interesi i Laurim par stuostim! Cīši cerim, ka aktivitatis i sasatikšonys motivēs jaunīšus ari iz prīšku interesētīs par latgalīšu volūdu, kai ari turpynuot aktivi īsasaisteit leluokuos i mozuokuos nūtikšonuos i pošim juos radeit.
Sasatikšonu finansiali pabolsta Sabīdreibys Integracejis fonds nu Kulturys ministrejis daškiertūs Latvejis vaļsts budžeta leidzekļu latgalīšu kulturys kusteibys “Volūda” projektā “Latgaliskuos kulturvidis styprynuošona: sadarbeiba, izpratne i īsaiste”.
