COLING projekta nūslāguma pasuokums Varšavā
Jau nu 2017. gods latgalīšu kulturys kusteiba “Volūda” ir vīns nu storptautyskuo projekta “Mozuok lītuotuos volūdys, leluos īspiejis. Sadarbeiba pietnīceibā, kūpīnu īsaisteišona i inovativi vuiceišonuos reiki— COLING, Nr. 778384” dalinīku. 8. i 9. septembrī Varšavā, Pūlejā, nūtyka projekta nūslāguma pasuokums, kurā partneri prezentēja sasnāgtūs rezultatus.
Latgalīšu kulturys kusteibu “Volūda” COLING projekta nūslāguma pasuokumā puorstuovēja Kristīne Pokratniece i Vineta Vilcāne. COLING projektā izstruoduoti vairuoki vuiceibu materiali latgalīšu rokstu volūdys vuiceišonys veicynuošonai vysaidom vacuma grupom. Daļa materialu sataiseiti sadarbeibā ar Oduma Mickeviča universitatis Poznaņā vuiceibspākim. Dreizumā sagataveitī materiali tiks īlikti tīšsaistē i bez moksys byus daīmami sevkuram interesentam.
Projekta nūslāguma centralais pasuokums beja pyrmīdzeivuotuoju volūdom i kulturom veļteitais kinu festivals “Myusu pošu vuordim”, kura laikā 8. septembrī ruodeja latgalīšu kinu “Piļsāta pi upis”. Pyrma kinys kluotasūšūs uzrunuoja Latvejis viestnīks Pūlejā Jurs Poikāns, bet piec kinys izruodeišonys nūtyka diskuseja par latgalīšu volūdys situaceju ar režisoru Vīsturu Kairišu i latgalīšu volūdys aktivisti Vinetu Vilcāni.
Kinu festivala laikā nūtyka ari kulturu daudzveideibys vokors, kurā skanēja latgalīšu dzīsmis grupys “Piparmētra” izpiļdejumā.
Projekts “Mozuok lītuotuos volūdys, leluos īspiejis. Sadarbeiba pietnīceibā, kūpīnu īsaisteišona i inovativi vuiceišonuos reiki— COLING, Nr. 778384” nūsaslēgs 2023. gods 30. septembrī. Tū finansiali atbolsta Eiropys Komiseja, projekta vodūšais partners ir Varšavys Universitate.