Broņs i Latgolys vuords
Janvara vydā ar aicynuojumu iz interveju puorsteidze Latvejis Radejis catūrtuos programys raidejuma “Latgolys vuords” redaktors Bronislavs Sprydzāns. Tod nu par Latgolys Studentu centra ituo goda planim i projektim 27. janvara raidejumā stuosteja Reigys biroja vadeituoja Edeite.
Raidejumu klausīs ite:
Paļdis Broņam par kasnedelis Latgolys stuostim vysys Latvejis radeju aparatūs! Prīca, ka pa reizei var dzierdēt koč kū ari par LgSC aktivitatem i pasuocīnim.
5. februarī 14:00 Rēzeknis Kuļturys nomā byus latgalisks pasuocīņs, kas byus veļteits Latvejis Radejis raidejumam “Latgolys Vuords” i tuo redaktoram Bronislavam Sprydzānam opolojā dzeivis jubilejā. Pasuokumu organizej Rēzeknis nūvoda pašvaļdeiba, i iz tū aicynuoti kulturys i sabīdriski aktivī darbinīki, kai ari sevkurš, kam nav vīnaldzeiga latgalīšu volūda i tuos nokūtne.
90.godu suokumā radejis raidejums “Latgolys Vuords” tyka izveiduots ar mierki paruodeit latgalīšu volūdys vierteibu. Par tuo redaktoru kliva Nagļu pogosta dzeivuotuojs Bronislavs Sprydzāns. Godu garumā jis naatlaideigi raudzejs byut kluot vysūs nūtykumūs Latgolā, kai ari maksimali daudz informacejis dūt sovūs raidejumūs par Latgolys ļaudim.
Svineigais pasuokums byuteibā baļsteits iz latgalīšu volūdys populariziešonu i nūzeimeigumu. Pasuokumā byus īspieja atsavērt iz 20 godu laikā padareitū, kai ari īsaklauseit B. Sprydzāna vadeituo raidejuma intervejuos ar dažaidim cilvākim – politikim, kulturys darbinīkim, muzykantim i ari prostajim lauku ļaudim.
Bronislavu jubilejā sveic ari “Latgolys Studentu centrs”, vielejūt vēļ daudzi latgalisku catūrtdīnis vokora raidejumu, spāku i prīcu byut kluot i stuosteit!
Bīdreibys 2008.- 2011. goda darbeibys programu atbolsta Islande, Lihtenšteina i Norvegeja EEZ finanšu instrumenta i Norvegejis finanšu instrumenta ītvorūs, i Latvejis vaļsts ar Sabīdreibys integracejis fonda storpnīceibu.