BOŅUKS 2010
Latgalīšu sabīdriskuo organizacejis “Kukuži”, “Latgolys Zvaigzne”, “Latgolys Studentu centrs”, “Latgolys Etnokulturys centrs”, “Latgolys Producentu Grupa”, LatBLUL i regiona pošvaļdeibys jau trešū godu piec kuortys reikoj latgalīšu kulturys goda bolvu “Boņuks”.
Latgalīšu kulturys goda bolvys “Boņuks” ideja i mierkis i veicynuot latgalīšu tradicionaluos i popularuos kulturys atteisteibu regionā i uorpus tuo rūbežom, apkūpuot lobuokūs paguojušuo goda veikumus, rūsynuot kvalitatis pīaugumu i originalitati myusdīnu latgalīšu kulturā.
Latgalīšu kulturys goda bolva “Boņuks 2010” tiks pasnīgta treis kategorejuos – “Sabīdreiba i kultura”, “Muzyka” i “Literatura”.
Kategorejā “Sabīdreiba i kultura” bolva tiks pasnīgta nominacejuos: “Lobuokais pasuocīņs/projekts”, “Latgalīšu kulturys sponsors/mecenats”, “Latgalīšu kulturys masu medejs”, “Goda pašvaļdeiba”, “Latgalīšu sabīdryskuo organizaceja”, “Lobuokais latgaliskais pasuocīņs školā”, “Goda školuotuojs”, “Lobuokais pasuocīņs kulturys/tautys nomā”, “Goda kulturys darbinīks”, “Goda amatnīks”, “Lobuokuo publicitatis akceja latgalīšu kulturā”, “Latgolys vuorda populariziešona kulturā”, “Par īguļdiejumu latgalīšu kulturys atteisteibā” i “Goda cylvāks”.
Kategorejā “Muzyka” iz bolvu varēs pretendēt nominacejuos: “Lobuokuo dzīsme”, “Lobuokais muzykys albums”, “Lobuokais muzykys video”, “Goda debeja muzykā” i “Radejis hits”. Sovukuort kategorejā “Literatura” bolva tiks pasnīgta nominacejuos “Lobuokuo proza”, “Lobuokuo dzeja”, “Lobuokais izdavums/gruomota”, “Spylgtuokuo publikaceja presē” i “Spylgtuokuo debeja literaturā”.
Iz Goda bolvu “Boņuks 2010” var pretendēt personys i personu grupys, kas sovā darbeibā i jaunradē lītoj latgalīšu volūdu i kas atbiļst kaidai nu bolvys nūlykumā nūsauktajom nominacejom. Bolva teik daškierta par kvalitativu sabīdreibys i profesionaļu īviereibys guvušu darbeibu ci jaunradi aizvadeitā godā.
Pretendentus Goda bolvys “Boņuks 2010” nominacejom var izvirzeit leidz 2011. goda 25. janvarim, rokstūt iz e-postu: producenti@inbox.lv
Latgalīšu kulturys goda bolvys “Boņuks 2010” nūslāguma pasuocīņs nūtyks 2011. goda 27 februarī, tuo nūrisis vīta i laiks tiks paziņuoti piečuok.
