Bīdreiba “LgSC” niu ir Latvejis Piļsūniskuos aliansis bīdrys

Bīdreiba “LgSC” niu ir Latvejis Piļsūniskuos aliansis bīdrys

Pošā apreļa suokumā bīdreiba “LgSC” tykuse par Latvejis Piļsūniskuos aliansis bīdru i “LgSC” jau bejuse vareiba pīsadaleit aliansis ituo gods kūpsapuļcē.

Latvejis Piļsūniskuo alianse ir leluokuo jumta organizaceja navaļstiskuo sektora interešu aizstuoveibā, kurys mierkis ir styprynuot piļsūniskū sabīdreibu Latvejā, atbaļsteit NVO kūpejuos interesis i veiduot lobvieleigu vidi tū darbeibai. Latvejis piļsūniskuo aliansa apvīnoj vaira nakai 140 bīdrus, kūpumā sastotūt ari vaira nakai 70 000 privatpersonu aba 70 % nu vysu NVO īsaisteituos personu Latvejā i 27 500 privatpersonu uorvaļstīs aba 11 % nu Latvejis diasporys.

Latvejis Piļsūniskuos aliansis miseja ir puorstuovēt piļsūniskuos sabīdreibys, tymā vydā bīdreibu i nūdybynuojumu kūpejuos interesis, kas baļsteitys iz demokratejis pamatbreiveibom i cylvāktīseibom. Vaira par LPA aktivitatem var izzynuot aliansis sātyslopā: nvo.lv.

Bīdreibys “LgSC” vadeituoja Edeite Husare par lāmumu īsastuot LPA soka: “Latvejis Piļsūniskuo alianse ir leluokuo organizaceja Latvejā, kas jau garus godus dūmoj par navaļstiskuo sektora atteisteibu Latvejā. Ari myusu mierkis i gribiešona ir, kab navaļstiskuos organizacejis palīk stypruokys, tamuos arviņ vaira īsasaista vaļsts dzeivuotuoji, jo eipaši Latgolys regiona dzeivuotuoji, deļtuo byušonu LPA bīdrim redzim kai vareibu izzynuot kai par NVO sektora īspiejom i jaunumim, tai ari dabuot atbolstu i cytu organizaceju pīredzi sabīdreibys aktiviziešonā”.

Īsastuošona Latvejis Piļsūniskajā aliansē ir vīna nu bīdreibys “LgSC” projekta “Bīdreibys “LgSC” kapacitatis styprynuošona piļsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā” aktivitašu. Projekts tyka eistynuots nu 2021. gods 1. maja da 2022. gods 31. oktobra i sajiems atbolstu Aktivūs īdzeivuotuoju fonda kapacitatis projektu konkursā. Projekta finansātuojs ir Islande, Lihtenšteina i Norvegeja.

Pastuosti cytim!

Leave a Reply

Your email address will not be published.

This site is protected by reCAPTCHA and the Google Privacy Policy and Terms of Service apply.