Baltvilka bolva par debeju bārnu i jaunīšu literaturā – Laurai Melnei i komiksam “Sunāns breiveibā”
Vakar, 24. julī, tyka paziņuoti Storptautyskuos Jāņa Baltvilka bolvys 2023 uzvarātuoji. AS “Latvijas Valsts meži” bolvā “Jaunaudze” par debeju bārnu i jaunīšu literaturā i gruomotu muokslā par uzvarātuoju tyka portala lakuga.lv redaktore i vīna nu “Volūdys” kustynuotuoju Laura Melne.
Pretendenti AS “Latvijas valsts meži” bolvai “Jaunaudze” par debeju bārnu i jaunīšu literaturā i gruomotu muokslā ir Tuoms Deimonds Barvidis par fantazejis romanu “Zaļā Dzīle” i Laura Melne par literarū davumu kūpā ar Viviannu Mariu Stanislavsku radeitajam komiksam “Sunāns breiveibā” (Latgalīšu kulturys kusteiba “Volūda”, 2023), tok par uzvarātuoju žureja, kurā itūgod struoduoja literaturzynuotneicys Ilze Stikāne i Sandra Okuneva, muokslys pietneica Līna Birzaka-Priekule, muokslinīks Roberts Koļcovs, kai ari sabīdreibys puorstuovi Māris Pavlovs nu Latvejis Universitatis Izgleiteibys zynuotņu i psihologejis bibliotekys i Gusts Ābele, jaunīšu studejis “Kāpnes” vadeituojs, atzyna Lauru.
Sajemūt bolvu, “Sunāns breiveibā” autore Laura Melne saceja: “Gruomota nabeja muna ambiceja palikt par rakstneicu, tei beja pandemejis garlaiceibys ideja, škūrstūt kaidu cytu muokslineicys Viviannys Mariis Stanislavskys ilustrātu gruomotu i dūmojūt, ka byutu breineigi, ka i latgaliski byutu kaida tik šmuka gruomota. Paļdis munai saimei i kolegem latgalīšu kulturys kusteibā “Volūda” par tū, ka nu jūs skanēja īdrūsynuojuma vuordi: “Laura, tok varbyut tu poša gribi pīraksteit taidu gruomotu!?” Paļdis Viviannai par atsasaukšonu idejai, kura suokuos beja tik nakonkreta, paļdis i sveicīni Līpuojai i redaktorei Janai Eglei. Koč ari asu saprotuse, ka pats svareiguokais i augšuokais nūviertiejums ir, ka bārnim pateik “Sunāns breiveibā”, ka jī smejās, skaitūt gruomotu, tok ari itei profesionaļu atzineiba maņ ir cīši, cīši svareiga. Asu saprotuse, ka maņ pateik raksteit bārnim i ka pateik tū dareit taišni latgaliski. Itys nūtykums – sajimtuo bolva – ir svareigs naviņ maņ, tok ari latgalīšu literaturai kūpumā, partū ka latgalīšu autori na bez īmesļa soka, ka nasajiut pījimti tai sauktajā kūpnacionalajā literaturā, itei bolva ir precedents, ka ari par latgaliski pīraksteitu gruomotu var sajimt vaļsts mārūga apbolvuojumu.”
Īvārojamuo dobys dzejnīka i bārnu kulturys atbaļsteituoja Jāņa Baltvilka vuordā nūsauktuo vaļsts nūzeimis bolva bārnu i jaunīšu literaturā i gruomotu muokslā itūgod tyka padūta jau 19. reizi. Žureja itūgod puorskaitejuse i izviertējuse 46 gruomotys, pīvieršūt viereibu teksta kvalitatei, i vēļ 19 izdavumi skaiteiti i apsavārti, meklejūt pretendentu gruomotu muokslys bolvai. Nūvāruoti vaira nakai 10 debitanti rakstnīceibā i ilustratora veikumā. Kūpumā sasaceņte 10 izdevnīceibu gruomotys.
Taipat Jāņa Baltvilka bolvu rakstnīceibā sajēme dzejnīks Žebers par dzejūļu kruojumu “Esejas un pasakas”, kai lobuokais bārnu gruomotu ilustrators bolvu sajēme Ernests Kļaviņš par Juliana Tuvima gruomotys “Pans Trallalnieks” i Inesis Zanderis gruomotys “Kamoliņš un kastīte” ilustracejom, žurejis specialbolva tyka gruomotys “En den dīno šoko loko tīno” rodūšajai komandai, bet skaiteituoji par sovu portala LSM.lv bolsuojuma simpateju izalaseja Aiju Lisovsku par gruomotu “Dullā diena Dundurzālē”. Par Jāņa Baltvilka bolvys storptautyskū laureati itūgod tyka leitovīšu rakstneica Igne Zarambaite par garstuostu “Mendzelmji” i tuo tulkuotuoja Dace Meiere.
Sveicynojam Lauru i turim nūceju, ka Sunāna pīdzeivuojumim byus turpynuojums i ari iz prīšku varēsim viesteit par Laurys jaunom gruomotom bārnim latgaliski!
Fotogalerejā: Storptautyskuos Jāņa Baltvilka bolvys 2023 ceremonejis šaļtenis, foto Edeite Laime
