Nūsasliedzs jaunīšu seminars „Atzolys”

Nu ituo goda 2. augusta leidz 6. augustam Preiļūs nūtyka „Atzolys” – jau sastū godu piec kuortys bīdreibys „Latgolys Studentu centrs” reikuots izgleitojūšs seminars Latgolys jaunīšim. Seminaru reikoj latgalīšu studenti deļ jaunīšu, kam ir interese par Latgolu i latgalīšu volūdu, literaturu, viesturi, kulturu.

Na par veļti „Atzolu” moto ir Kazimira Skryndys vuordi: „Iz tom jaunom atlasem lai ir vysa myusu cereiba i par jom lai mes vysvairuok guodojom. Izaugs lelys atlasis, tod ari vacim kūkim jūs pakrieslī byus loba atpyuta.” Seminarā jaunīši sasateik i īsavuica byut kūpā ari latgaliski – kasdīnā, svātkūs, vuiceibuos, prīcā i sovuos puordūmuos, kab apsazynuotu sovys saknis i īspieju kūpt sovu īpašū pateibu i iz prīšku.

Nu 2004. goda, kod pyrmū reizi nūtyka nūmetne „Atzolys” i pyrmū reizi salasēja kūpā latgaliski runojūšus, rodūšus i dzīdūšus jaunīšus, atzolīšu bolsi vosoruos ir bejuši dzierdami Kuorsovā, Baļtinovā, Dagdā, Rogovkā, Bieržgalī. Itūgod pyrmū reizi „Atzolys” nūtyka Preiļu pusē.

Pavysam „Atzoluos” beja 20 dalinīku – puiši i mārgys nu Latgolys: Kuorsovys, Rogovkys, Saļnovys, Kolupa, Preiļu, Ludzys, Rēzeknis i c. i nu puornūvodu – Lelvuordis. Atzolīši dzeivuoja ustabeņuos ar Preiļu apleicīnis vītvuordu nūsaukumim: puiši dzeivuoja Muktupuovulūs i Prīkuļūs, meitys – Upmolā, Vuorkovā, Arendolē, Rūžupē, Tyltovā, Rozalinā.

Kotra dīna suocēs ar reita rūsmi i reita riņči, kura laikā tyka pīškierti ordeni īprīkšejuos dīnys spylgtuokajim atzolīšim, skaiteitys „Atzolu” spletnis, kotrys atzolīts dabuoja sovu laimis devu – vysmoz 26 atzolīšu apskuovīņus.

Seminara laikā dalinīki klausejuos lekcejis par latgalīšu literaturu i latgalīšu rokstu volūdu, prezentaceju taiseišonu, latgalīšu portalim internetā. Īgiutuos zynuošonys atzolīši varēja nūstyprynuot praksē – taisūt seminara avīzi „Atzolu Viestness”, prezentacejis par nūtykumim i cylvākim, kas saisteiti ar Latgolu.

Ari itūgod atzolīši ekskursejis laikā izzynuoja vaira par seminara nūrisis vītu – Preilim – i jūs viesturi.

Vokorūs atzolīši varēja rodūši izapaust, taisūt vysaidus muzikalus i teatralus prīšknasumus pasuokumim „Preiļu Oskars”, „Dzīšmu dueļs”, īpazeistynojūt puorejūs ar sevi, sovim talantim „Talantu vokorā”, sovu dzymtū vītu, sovu „Atzolu” ustabeņu i c. Juoatzeist, ka vysi atzolīši ir cīši rodūši i talanteigi jaunīši – kai  aktīri i muzykanti, tai muokslinīki i ailinīki, akrobati i doncuotuoji. Seminara laikā topa jaunys dzīsmis, ailis, spuornuotī teicīni.

Piec rodūšūs aktivitašu atzolīši izadoncuoja, doncojūt tradicionalūs daņčus. Kotrys ustabenis atzolīšim beja sovs „Atzolu” krysttāvs voi krystamuote nu organizatoru pusis, ar kurim piec garuos dīnys varēja puorrunuot dīnys prīcys i bādys, pasarunuot par dzeivi vyspuor. „Atzolu” krystvacuoki skaiteja prīškā latgalīšu puosokys, stuostus i c. Pyrms naktsmīra vysi atzolīši dzīduoja mīga dzīsmeiti „Par sapynu zyrgim”.

„Atzolu” dorba grupys i dalinīku vuordā lelu paļdis sokom Vaļsts Kulturkapitala fondam par finansialū atspaidu, SIA „Salang-P” vadeibai i darbinīkim par atsauceibu i seminara atbaļsteišonu ar kancelejis precem, Preiļu Vaļsts gimnazejis folklorys kūpai „Rūtoj” i vadeituojai Ilzei Rožinskai par skaneigom dzīsmem i ļusteigim daņčim! Taipat sokom paļdis grupys „D-Light” puišim par myusdīnu muzyku i bala daņčim, Ilgai Šuplinskai, Muorai Mortuzānei, Iretai Čeksei, Juram Viļumam par saistūšom i interesantom lekcejom! Sokom paļdis ari bistro „Preilene” vadeibai par sadarbeibu i kolektivam par gordu i suoteigu iedīni, a seviški – Preiļu Vaļsts gimnazejai par naktsmītnem i telpom seminara nūrisei!

Paļdis dalinīkim par aktivitati, rodūšū i latgaliskū goru i paļdis dorba grupai par nasovteigu paleidzeibu seminara organiziešonā i vadeišonā. Itūgod „Atzola” dorba grupa atsaškeire ar tū, ka vysi ir bejušī atzolīši: Linda Orole, Arnita Grigāne, Edgars Ciganovičs, Laila Kaša, Laima Rēriha, Vineta Vilcānei i Vita Briška. Paaudžu maiņa ir nūtykuse, atzolys jau dūd paieni – cytom atzolom.

„Atzolu” vadeituoja Linda Orole,

bīdreibys „Latgolys Studentu centrs” vaļdis lūcekle

Pastuosti cytim!

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.