Atkluota jaunīšu izaugsmis i Latgolys izzynuošonys programa “LTG tu dū!”
Sastdiņ, 8. aprelī, Rēzeknē tyka atkluota jaunīšu izaugsmis i Latgolys izzynuošonys programa “LTG tu dū!”. Programys mierkis ar nūdarbeibom, braucīnim, aktivu i zynūšu cylvāku satikšonu ir motivēt jaunīšus vaira izzynuot i pošim īsasaisteit latgalīšu kulturvidis i sabīdryskajuos nūrisēs, byut par jaunajim Latgolys liderim.
Programā dasasaceja 25 jaunīši nu vysaidu Latgolys vītu, bet vysu vaira nu Rēzeknis, Preiļu i Bolvu nūvodim. Programys atkluošonā Latgolys viestnīceibā GORS kluotyn beja 12 nu vysu vaira nakai 20 “LTG tu dū!” īsasaisteit gotovūs dalinīku. Motivaceja īsasaisteit programā jaunīšim ir vysaida, tok leluokuo daļa tū radz kai īspieju izzynuot vaira latgalīšu kulturu, pošim vaira runuot latgaliski i piec tam ari vaira īsasaisteit latgalīšu kulturys nūtikšonuos voi izmontuot dabuotuos zynuošonys sovuos aktiviatēs.
Ar jaunīšim programā, kas īs da decembra, struoduos latgalīšu kulturys kusteibys “Volūda” kuratoris Dagneja Dudarjonoka, Edeite Husare i Amanda Anusāne. Pyrmajā sasatikšonā jaunīši īpasazyna sovā vydā, izzynuoja vaira par “Volūdu” i programys mierkim, kai ari sajēme “LTG tu dū!” dorba burtneicys, kuruos programys laikā byus juoaizpiļda vairuoki aizdavumi. Piec atkluošonys pasuokuma jaunīšim par reizi beja vareiba pīsadaleit diskusejā “Kam juobyut, kab byutu ite?”, kas tyka veļteita dzeivei i atsagrīsšonai Latgolā.
Jaunīšu izaugsmis i Latgolys izzynuošonys programā “LTG tu dū!” itūgod paradzātys devenis nūdarbeibys (kluotīnē i tīšsaistē), kuruos sarunu, aizdavumu, ekskurseju, diskuseju i praktiskūs dorbu veidā jaunīšim byus vareiba izzynuot latgalīšu kulturvidis i sabīdryskūs procesus, īpasazeit ar aktivim Latgolys cylvākim, gasteit dareituoju uzjāmumūs, īsavuiceit latgalīšu rokstu volūdys pamatus, atteisteit sovys tūpūšū lideru prasmis, kai ari jau praktiski pošim īsasaisteit latgalisku projektu eistynuošonā.
Fotogalerejā: jaunīšu izaugsmis i Latgolys izzynuošonys programys “LTG tu dū!” atkluošona, foto Amanda Anusāne
Programa ir vīna nu latgalīšu kulturys kusteibys “Volūda” (bīdreibys “LgSC”) projekta “Latgaliskuos kulturvidis styprynuošona: sadarbeiba, izpratne i īsaiste” aktivitašu, kuru 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
