Rss Feed Tweeter button Facebook button Youtube button
Latgolys Studentu centrs
Aizvadeits pasuokums „LaLaDra” Juosmuižā

25. augustā Raiņa muzejā Juosmuižā (Preiļu nūvoda Aizkalnē) 17.00 nūtyka literari muzykalais pasuocīņs „Latgalīts latgalīšam draugs” (LaLaDra). Pasuokumā ar sovim tekstim pīsadaleja Zaiga Lāce, Raibīs Suņs, Valentins Lukaševičs, Dagneja Bramane, Jurs Viļums, nu ar muzyku – Jurs Vucāns (nu grupys „Likteneigais pagrīzīņs iz Vainovu”), daGunchi (Guntis Rasims nu grupys „Bez PVN”), Laura Kalvāne i folklorys kūpa „Dyrbyni.

Kai ituo pasuokuma vadmotivs tyka izlaseits Raiņa jauneibys dīnu moto: „Carpe diem!” (latgaliski – „Giuņ šaļtenis”). Pasuocīņa reikuotuoji – bīdreiba „Latgolys Studentu centrs” i Raiņa muzejs aicynuoja giut vosorys šaļts i pasavērt iz Raini kai Latgolā dzeivuojūšu jaunīti, i taipoš aizdūt sev interesejūšūs vaicojumus par myusdīnu latgalīšu literatu i muzykantu kasdīnu.

Pasuokuma laikā dzejis, prozys, dzīšmu klauseišonuos nūtyka dažaiduos Raiņa muzeja ustubuos. Skaitejumi i dzīsmis tyka papyldynuotys ar stuostim par Raiņa (tūlaik Juoņa Plīkšāna) jauneibu. Kai izaruoda, Juoņam Plīkšānam napatyka lauku dorbi tāva saimesteibā, jis lyka kartys par sovu jaunu dīnu mīlesteibu Tekleiti. Vysuvaira jam patyka aizīt kaidā nūstuokā vītā i skaiteit gruomotys voi  raksteit, giut zivs voi juot zyrga mugorā pa apleicīni.

Zaiga Lāce sevi saucūt pa „trešū tāva dālu” deļ tuo, ka jai asūt diveji bruoli, kas padorūt vysus dorbus i jai grybūtīs ar jim vysur īt liedza. Jei skaiteja stuostu par Supermenu, kas jai izduovuoja laimeiti – skaidru, lobu redzi. Valentins Lukaševičs skaiteja sovu dzeju i pastuosteja, ka ir planavuots vēļ vīns juo dzejis kruojums „Sūpluokums”. Par kasdīnys lītom – nu lauku dorbim bierneibā jam napatyka revēt burkuonus, a patyka art ar zyrgu, garšoj vyrtys guļbys ar myzom. Skaneiguo bolsa eipašneice Laura Kalvāne dzīduoja sovys dzīsmis latgaliski „Par vosoru Latgolā” i „Vīnaiž atškireigi”. Laura pastuosteja, ka vysu dzeivi jei ir saisteita ar muzyku, vysu vaira nu sovom rakstura eipašeibom jai pateik sprygonums, planavoj Ludzā jaunu muzykantu puļceņu. Raibīs Suņs skaiteja sovu dzeju, pastuosteja par muzykaluo projekta „Kapļi” jaunajom dzīsmem. Vīna nu muzeja ustobom beja veļteita mīlesteibys temai, Dagneja Bramane skaiteja prozys dorbu „Mīlesteiba”, kuru rakstejuse nazkod vydsškolys laikā, niu izpratne par mīlesteibu asūt daudzi plašuoka. Guntis Rasims dzīduoja dzīsmis latgaliski i pastuosteja, ka dreizumā gaidomi jaunumi nu grupys „Bez PVN”. Folklorys kūpys „Dyrbyni” dalinīki beja cīši atškireigi, tī dzīž viesturis ekspediceju fans Viktors, 4. klasis škoļneica Jadviga, BMV braukšonys cīneituoja Agita, mīreiga meitine nu Tadenovys Agnese, kūpys vadeituoja Ilze Mežnīce i cytu. Dyrbyns asūt darbeigs cylvāks, i šī darbeigī cylvāki nūspielieja latgalīšu tautys dzīsmis „Gonūs” i „Reigys kungi”. „Dyrbyni” pasaryupieja ari par vokora dančim. Ar sovim lobuokuojim tvītim par Latvejis Saeimys kasdīnys dzeivi  stuosteja Jurs Viļums.

Bīdreibys „Latgolys Studentu centrs” pasuokumi „LaLaDra” savad vīnuvīt rodūšus Latgolys cylvākus, kurim sasateikūt rūnās jaunys izjiutys, idejis i jauni rodūšī dorbi.

Ka ir kaidi tekstu i muzykys autori, kas grybātu pīsadaleit taida veida pasuokumūs, aicynuoti sasazynuot ar bīdreibu  „Latgolys Studentu centrs”.

Dagneja (T: 28362243); lgsc@lgsc.lv

www.lgsc.lv

Foto: Zane Bramane

Pastuosti cytim!

Leidzeigī roksti:

Leave a Reply