Aizvadeita saruna-diskuseja ar volūdnīkim nu Pūlejis ap latgalīšu volūdu i tuos pietejumim
27. julī Rēzeknis Muokslys nomā latgalīšu kulturys kusteiba “Volūda” i naformaluo apvīneiba “Nezināmā Rēzekne” aicynuoja iz volūdai i tuos izzynuošonai veļteitu piecpušdīni ar diskuseju ap volūdom, tūs statusu, dzeivi daudzvolūdeibys vidē
Sarunā-diskusejā ““Apstrīdētās” valodas un daudzvalodība kā dzīves vide” pīsadaleja Oduma Mickeviča universitatis Poznaņā (Pūleja) pasnīdzieji, volūdnīki – Tomašu Viherkeviču (Tomasz Wicherkiewicz), Pīteri Greblūnu (Piotr Grablunas) i Nikole Nauu (Nicole Nau).
Pasuokumā jī vysu pyrma pasadaleja ar tū, kai pietejumi i projekti jūs atvaduši iz Latgolu, kas itūs godu laikā dareits i kaida ir Latgolys lingvistiskuo ainova myusu dīnuos. Vysi volūdnīki nu Poznanis ar Latgolu i tuos volūdys situaceju ir pazeistami jau vysā garu laiku, taisejuši ite pietejumus, interviejuši vītejūs ļauds i izzynuojuši Latgolys lingvistiskuos ainovys byušonu vysaidai, paleidzējuši i vēļ arviņ paleidz latgalīšu volūdys izpētis i vuiceibu materialu veiduošonā.
Pasuokuma ūtrajā daļā volūdnīki atbiļdēja iz saguojušūs vaicuojumim, kas vysu vaira saistejuos ar pietnīku pīredzi ap latgalīšu volūdu, kai ari prognozem, kaida varātu byut latgalīšu volūdys situaceja iz prīšku. Diskuseja beja pīdzeivojama ari tīšraidē, tuo volūdys – latvīšu, latgalīšu i angļu.
Niu diskusejis īroksts daīmams ite:
Fotogalerejā: diskuseja Rēzeknē, foto Amanda Anusāne.
Saruna ir vīna nu latgalīšu kulturys kusteibys “Volūda” projekta “Latgaliskuos kulturvidis styprynuošona: sabīdreiba, izpratne i īsaiste” aktivitašu, kurys 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu. Nūtikšonu leidzfinansej ari Eiropys Savīneibys pietnīceibys i inovacejis pamatprograma “Apvārsnis 2020” saskaņā ar Marejis Sklodovskys-Kirī dotaceju Nr. 778384. Saruna nūteik projektā “Mozuok lītuotuos volūdys, leluos īspiejis. Sadarbeiba pietnīceibā, kūpīnu īsaisteišona i inovativi vuiceišonuos reiki (COLING Nr. 778384)”.