Aizvadeita pyrmuo “LgSC” bīdru apvuiceibu programys sasatikšona

Aizvadeita pyrmuo “LgSC” bīdru apvuiceibu programys sasatikšona

Jau viesteits, ka bīdreiba “LgSC” sajāmuse Aktivūs īdzeivuotuoju fonda (AIF) atbolstu organizacejis kapacitatis styprynuošonai. Vīna nu projekta aktivitašu ir bīdreibys kūpeibys i vadeibys prasmu styprynuošona, kū paradzāts eistynuot ar četru mienešu “LgSC” bīdru i bīdreibys izaugsmis i mentoringa programu. 30. majā aizvadeita pyrmuo programys aktivate.

Svātdīnē, 30. majā, kluotīnē Lūznovys muižā i attuolynuoti kotrys nu sovys sātys sasatika “LgSC” aktivisti, kab suoktu dorbu pi bīdreibys kūpeibys styprynuošonys. Pyrmajā apvuiceibu programys reizē sasatyka 13 “LgSC” bīdri, projektu vadeituoji i aktivisti, kab runuotu par vierteibom i mierkim, kas vysus saista i rūsynoj dareit lītys. Sasatikšona ari breineigi atguodynuoja par tū, deļkuo vyspuor kotrys nu dalinīku īsasaistejuši latgaliskajās aktivitatēs, bīdreibys dorbā, kas pīdzeivuots i kai turpynuot dorbu iz prīšku.

“LgSC” apvuiceibu programu voda izaugsmis platformys MeYou.One treneri Ieva Johansone i Henric Johansson, kuri profesionali vierzieju sasatikšonys i vierteibu saprasšonys procesu kai kluotīnis, tai attuolynuotuos byušonys dalinīkim. Apvuiceibu programu paradzāts turpynuot junī i piečuok piec vosorys puortraukuma rudinī. “LgSC” bīdru i bīdreibys izaugsmis i mentoringa programā var īsasaisteit kotrys “LgSC” bīdrys voi potencialais interesents sevkurā breidī. Vaira dazynuot var, rokstūt Edeitei edeite@lgsc.lv.

Nu 2021. goda 1. maja da 2022. goda 30. apreļa bīdreiba “LgSC” eistynoj projektu “Bīdreibys “LgSC” kapacitatis styprynuošona pylsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā”. Projekts sajiems atbolstu Aktivūs īdzeivuotuoju fonda kapacitatis projektu konkursā. Projekta finansātuojs ir Islande, Lihtenšteina i Norvegeja. Sajimtais atbolsts 19 994,87 €. Vaira par projektu var izzynuot ite: https://lgsc.lv/aktivus-idzeivuotuoju-fonds/.


Pastuosti cytim!

Leave a Reply

Your email address will not be published. Required fields are marked *

This site is protected by reCAPTCHA and the Google Privacy Policy and Terms of Service apply.