Aizvadeita diskuseja ap jaunīšim aktualim vaicuojumim par dzeivuošonu i atsagrīsšonu Latgolā
Atbiļdis iz vaicuojumu ap tū, kam juobyut, kab jaunīši dzeivuotu i grybātu dzeivuot Latgolā, Rēzeknē, 8. aprelī, diskusejā ar jaunīšim i dažaidu sferu puorstuovim – radejis personeibu Lauri Zalānu, Saeimys deputati Leilu Rasimu, sabīdryskū aktivistu Sandi Mesteru i studentu puorstuovi Sandi Promu – raudzeja aktualizēt latgalīšu kulturys kusteiba “Volūda”.
Sastdiņ, 8. aprelī, Rēzeknē, Latgolys viestnīceibā GORS, nūtyka jaunīšu izaugsmis i Latgolys izzynuošonys programys “LTG tu dū!” atkluošonys pasuokums, par reizi piec kura 13.00 stuņdēs sevkurs interesents beja aicynuots byut kluotyn gūdeigā diskusejā ar jaunīšim i dažaidu sferu puorstuovim par tū, kam juobyut, kab jaunīši niu dzeivuotu i grybātu dzeivuot/atsagrīzt Latgolā? Diskusejā “Kam juobyut, kab byutu ite?” kai eksperti pīsadaleja – radejis personeiba, influencers i jūku meistars Lauris Zalāns, 14. Saeimys deputate Leila Rasima, Rēzeknis Tehnologeju akademejis studentu pošpuorvaļdis aktivists Sandis Proms i sabīdryskais aktivists Sandis Mesters.
Diskusejis pyrmajā daļā tuos eksperti tyka aicynuoti pasadaleit ar sovu redzīni i pīredzi, atbiļdēt iz vaicuojumim, kas skar Latgolys ekonomiskū i volūdys situaceju. Diskusejis daleibnīkim beja sagataveiti pīci fakti i vaicuojumi par Latgolu, tok vysi īspieja atbiļdēt viņ iz trejim. Pyrmais fakts beja par videjuos olgys situaceju Latgolā, kas ir daudzi mozuoka par videjū vaļstī kūpumā (2022. godā videjuo olga (piec nūdūkļu nūmoksys) beja Latvejā 1006 €, bet Latgolā gondreiž par 300 eiro mozuok – 728 €). Vaicuojums, iz kuru ekspertim i piečuok ari diskusejis daleibnīkim vajadzēja atbiļdēt, beja “Cik byutu juosajem neto, kab Latgolā finansiali justūs drūsai?”. Ūtrais vaicuojums skuore temu par vysaidu pakolpuojumu daīmameibu – 2022. godā Latvejā tyka likvidātys 35 vuiceibu īstuodis, nu kurūs 15 beja Latgolā. Eksperti i daleibnīki tyka aicynuoti atbiļdēt iz vaicuojumu par treis golvonajim pakolpuojumim/īspiejom, kas ir vajadzeigi dzeivei regionā (i na tik). Trešais vaicuojums, kuru diskusejis laikā eksperti i daleibnīki īspieja atbiļdēt beja par dzeivuotuoju skaita “pīaugumu” – Latgolā kotru godu videjais īdzeivuotuoju skaita pīaugums ir –5,4 tkst., kas ir leluokais Latvejā, cikom kas Reigys regionā –4 tkst., bet puorejūs regionūs videji –2,6 tkst., deļtuo vaicuojums beja par motivaceju dzeivuot Latgolā voi potenciali atsagrīzt.
Diskusejis ūtrajā daļā nūtyka dorbs grupuos vysim kluotyn asūšajim, kab kotrā nu ekspertu puorstuovātūs sferu – kultura, politika, sabīdryskuo īsaiste i izgleiteiba – raudzeitu dabuot atbiļdi iz diskusejis pamata vaicuojumu, kas tod ir vajadzeigs, kab jaunīši grybātu dzeivuot i dareit Latgolā.
Fotogalerejā: diskuseja “Kam juobyut, kab byutu ite?”, foto Amanda Anusāne
Diskuseja ir vīna nu latgalīšu kulturys kusteibys “Volūda” (bīdreibys “LgSC”) projekta “Latgaliskuos kulturvidis styprynuošona: sadarbeiba, izpratne i īsaiste” aktivitašu, kuru 2023. i 2024. godā atbolsta Sabīdreibys integracejis fonds nu Kulturys ministrejis daškiertūs Latvejis vaļsts budžeta leidzekļu.
