“Agruo pavasara” obrozi

Sastdiņ, 30. aprelī Latvejis Nacionalajā bibliotekā nūtyka latgalīšu literaturys i muzykys pasuocīņu cykla “Cyti godalaiki” ūtruo sasatikšonys reize “Agruo pavasara” zeimē. Par pasuocīņa veiksmeigu nūrisi ryupejuos Aigars Runčis, deļ tuo, ka pasuocīņa laikā beja juopagiust cīši daudz – planavuotūs div stuņžu laikā kūpā byušona īsavylka iz trejom.

Klauseituojus ar sovu stuostu, kas saraksteits jau pyrma loba laika, bet dabeigts viņ niu, prīcieja Ilze Sperga. Pyrmū reizi publiski izskanieja ari rakstneicys Laimys Muktupāvelys stuosts “Naatpazeitī zīdi“, kuru latgaliski puorlics Valentins Lukaševičs. Vysu beidzūt literarū pasuocīņa dali nūslēdze Juoņs Ryučāns (Ivars Magazeinis) ar sovom ailem. Muzykali puorsteidze i biblioteku ar sovom dzīsmem pīskandynuoja grupa “D-Light”, kas itūgod svinēs sovu pīktū pastuoveišonys godadīnu, i muzykants Anss Ataols Bierzeņš, kurs cytu dzīšmu vydā pīduovuoja ari kaidu pa vysam jaunu. Anss Ataols Bierzeņš iz leluo ekrana atruodeja dzīsmis “Babeņa” video verseji, pi reizis rozstuostūt fiļmiešonys gaitu i aizkulišu gadejumus.

“Agrais pavasars” nūsaslēdze ar seņ gaideituos gruomotys “Es soku. Tu soki. Puorsokys par krīzi” prezentaceju –  gon vēļ bez pošys gruomotys – drupeit datryuka laika tipografejis dorbim. Itymā nedeļā gruomota gon byus pīeimama jau taustamā formatā i maja mienesī paradzātys prezentacejis ari cytuos Latvejis vītuos – sekojit leidza informacejai!

Paļdis Reigys Izgleiteibys, kulturys i sporta departamentam par atbolstu i Latvejis Nacionalajai bibliotekai par telpom! Paļdis vysim pasuocīņa dalinīkim, apmaklātuojim i paleigim pi organizeišonys!

 

Edeite

LgSC Reigys biroja vadeituoja