Sarunys, daņči i ozbora putra – nasteidzeiguo nedeļgola “Bondarūs” ūtrei sezona

Pārnejuo gods vosorā “Volūdys” kustynuotuojus pi seve gostūs iz nasteidzeigu kūpā byušonu lauku sātā “Bondari” aicynuoja myusu aktiviste i niu ari vaļdis lūcekle Regita Zeiļa. Itū vosoru pošā augusta golā ar sarunom par dorbim i nadorbim, daņčim i ozbora putrys viršonu ari nūslēdzem “Bondarūs”.

Nedeļgola bez strāpuošonys ideja ir lobuoka īpasazeišona, koč kuo jauna izzynuošona, sarunys, ideju pakustynuošona i vīnkuorša kūpā byušona, kurai kasdīnys dorbūs i skriejīnī nasaīt cik daudzi laika. Itys vyss saguoja ari šūreiz – sasatikšona suocēs ar niu par tradiceju palikušū ozbora putrys viršonu piec saimineicys Regitys receptis, piec ekskursejis pa “Bondarim” i tūs apleicīni i pušdīnem, pasprīdem par rudiņa sezonā gaidomajim jaunajim “SPĀKA LAB” seminarim, taipat īsavuicejom jaunys spēlis i saspieļuojom ari “Tvisteru” i poši sovu “Čipierkstneiti”. Bet dīnys nūslāgumā ļuovomēs daņčim, ar kurim prīcynuoja jaunīšu izaugsmis i Latgolys izzynuošonys programys “LTG tu dū!” aktiviste Antra i juos školys bīdrine, niu īpazeituo Ērika. Meitiņu vejūlis i mandolinys spēlei pīsavīnuoja ari Edeite, bet iz daņčim vysu aktivuok aicynuoja “Vīteru” Irbe.

Eistynuojom ari vīnu nu pasauļa “TikTok” tendeņču – iz nūtikšonu atīt ar gastiņci taišni taidā kruosā, kaidā pats esi apsaviļcs, kū video īmyužynuoja Amanda. Video var nūsavērt ITE.

Fotogalerejā: nasteidzeigs nedeļgols “Bondarūs”, foto Amanda Anusāne