Akcejā #WhiteFriday var atbaļsteit ari bīdreibys “LgSC” dorbu
Pīktdiņ, 4. novembrī labdareibys organizaceja “Ziedot.lv” kūpā ar uzjāmumu “Mobilly” jau catūrtū reizi aicynoj iz par tradiceju palykušū Vyslatvejis zīduošonys akceju #WhiteFriday (#BoltuoPīktdīne). Tuos mierkis ir ari itūgod veicynuot sabīdreibys īsasaisteišonu i zīduojumu vuokšonu vaira nakai 90 labdareibys i navaļstiskajom organizacejom, kam kasdīnys dorbu padareišonai eipaši vajadzeigs finansials atbolsts. Akcejis daleibnīku vydā ir ari bīdreiba “LgSC”.
Labdareibys akceja #WhiteFriday aizasuoce 2020. godā kai atbiļde “Black Friday” aba malnuos pīktdīnis īsapierkšonys trokumam, kod tuos organizatori aicynuoja sabīdreibu īsapierkšonys vītā izbaudeit zīduošonys azartu i izceļt lobūs dorbus, kū, nasaverūt kasdīnys izaicynuojumim, dora dažaidys organizacejis. Tūs skaits kotru godu turpynoj augt, taipat aug ari akcejis laikā pazīduotuo naudys summa, kas līcynoj par īdzeivuotuoju gribiešonu paleidzēt leidzcylvākim ari ekonomiski gryutuokā šaļtī. Pārņ sazīdūtūs leidzekļu kūpejuo summa beja vaira nakai 84 000, i ari itūgod kotrys teik aicynuots snēgt sovu atbolstu kai leluokom, tai mozuokom organizacejom i iniciativom, kas kasdīnā vysa kuo dora sabīdreibys lobā.
“Vaļsts navar byut bez piļsūnyskys sabīdreibys, kas īsasaista sabīdreibai svareigu problemu rysynuošonā. Akceja #WhiteFriday ir breineiga iniciativa, kas nūdrūsynoj platformu daudzu i dažaidu mums vysim svareigu mierku sasniegšonai,” komeņtej organizacejis “Ziedot.lv” vadeituoja Rūta Dimanta.
Lela daļa svareigūs iniciativu teik eistynuotys viņ ar atbaļsteituoju regularim zīduojumim, i, koč ari organizaceju vajadzeibys pasamaina leidza ar itūšaļt aktualajim sabīdryskuos dzeivis procesim, ar #WhiteFriday akcejis paleidzeibu ir vareiba nūvierzeit leidzekļus konkretim i saleidzynūši eisā laika pūsmā sasnādzamim mierkim. Pārnejā godā akcejā pīsadaleja 60 organizaceju, nu itūgod tūs jau ir gondreiž 100. Akcejis daleibnīku vydā ir ari bīdreiba “LgSC”, kurei kasdīnā dorbojās ar aktivitatem i iniciativom, ar kurom rauga popularizēt latgalīšu volūdu i tuos aktivuokā lītuošonā īsaisteit sabīdreibu, par pīmāru, akcejā “Latgalīšu volūdai draudzeiga vīta”. Bīdreiba “Mobilly” organizaceju katalogā atrūnama ITE. Tok bīdreibys komanda aicynoj akcejā atbaļsteit naviņ “LgSC”, nu turpynuot atbaļsteit aktivitatis, kas paleidz Ukrainai i ukrainim turētīs preteimā Krīvejis agresejai.
“Ir eistyna prīca, ka ari itūgod kūpā ar “Ziedot.lv” varim dareit lobus dorbus i mudynuot iz tim vysus Latvejis dzeivuotuojus. Itys laiks mums vysim nav vīnkuoršs i ir pylns izaicynuojumu, vys tik arviņ pīaugūšais pozitivūs labdareibys projektu i dažaidu iniciativu skaits līk napasadūt i turpynuot vairuot lobū, kūpā paleidzūt tim, kam myusu atbolsts itūšaļt ir vēļ svareiguoks nakai koč kod. Taišni deļtuo aicynojam kotru Latvejis īdzeivuotuoju zīduot kaidai labdareibys voi navaļstikajai organizacejai, kuru mierki ir dažaidi, nu gribiešona vīna – kab Latvejis sabīdreiba byutu lobuoka,” komeņtej “Mobilly” vadeituojs Girts Slaviņš.
“Akceja #WhiteFriday kai reizi īkreit bīdreibys “LgSC” dzimšonys dīnys nedeļā, kurā 2. novembrī svieteisim sovys oficialuos registracejis dīnys 17. godadīnu. Itūs godu laikā asam aktivi darejuši, kab latgalīšu volūda skanātu i byutu daudzūs dažaidūs veidūs, kai ari kab sabīdreibai pošai byutu svareigi tamā runuot. Itūreiz akcejā kai sovu eipašū mierki asam izavieliejuši atbolstu dorbim, kas vaira veļteiti bārnim i jaunīšim, jo taišni tei ir sabīdreibys daļa, kura latgaliski runoj i zyna vysu mozuok, bet nu kuru iz prīšku byus atkareigs tik daudzi!” soka bīdreibys vadeituoja Edeite Husare.
Vaira informacejis par ituo gods akceju ite. Taipat atguodynojam, ka zīduot bīdreibys dorbam “Mobilly” sistemā var naviņ itamā nedeļā i akcejis laikā, bet ari tod, kod ir gribiešona. Kai vīna nu īspieju ir ari regularais moksuojums.
Zīduošonys īspieju bīdreibai paplašynuošona caur platformu “Mobilly” i īsasaisteišona akcejā #WhiteFriday ir vīna nu bīdreibys “LgSC” aktivitašu projektā “Bīdreibys “LgSC” kapacitatis styprynuošona pylsūniskuos sabīdreibys i īdzeivuotuoju leidzdaleibys veicynuošonai i tūs interešu puorstuoveibai Latgolys regionā” ar mierki styprynuot bīdreibys “LgSC” kai patstuoveigys, aktivys, ilgtspiejeigys i sabīdreibā pozitivys puormainis nasūšys organizacejis kapacitati. Projektu atbolsta Aktivūs īdzeivuotuoju fonds, bet tuo finansātuojs ir Islande, Lihtenšteina i Norvegeja. Vaira par projektu ITE.