Folklorys kūpa “Ceidari” pīsadaleis folklorys festivalā “Baltica 2022”

Bīdreibys “LgSC” folklorys kūpa “Ceidari” ari byus vīns nu vaira nakai 220 kolektivu – storptautyskuo folklorys festivala “Baltica 2022”, kas nūteik nu 6. da 10. juļa, dalinīku.

Folklorys festivals “Baltica” teik organizāts jau nu 1987. goda i kasgadeji nūteik kaidā nu Baļtejis vaļstu. 2022. goda festivala tema ir “Spēle” i moto “Nāc ar mani spēlēties”. Itūgod festivalā vysplotuok byus puorstuovāta taišni Latgola. Vysaiduos festivala nūtikšonuos pīsadaleis 76 kolektivi nu Latgolys, Reigu i Reigys regionu puorstuovēs 35 kolektivi, kuru vydā ari “Ceidari”, Kūrzemi – 41 kolektivs, Vydzemi – 38, Zemgali – 29 i Sieleju – 3 kolektivi.

Festivala dalinīku vydā byus ari div latvīšu diasporys kolektivi – Zīmeļanglejis latvīšu folklorys kūpa “Dūdalnieki” i Latvejis Nacionaluos kulturys bīdreibys Igaunejis folklorys kūpa “Rēvele”, kai ari četri gostu kolektivi nu Igaunejis i Leitovys. Tradicionali festivala gostu vydā byus ari stuostnīceibys nūzaris puorstuovi. Apmaklātuojim byus vareiba īsaklauseit lītuvīšu stuostneicys Mildys Varnauskaites (Viļņa) i oksitaņu stuostneicys Monikys Burgys (Monique Burg) iztielē i montuotajuos atmiņuos.

“Ceidaru” uzastuošonu ar desmit minutu programu varēs redzēt pīktdiņ, 8. julī, nu 14.10 Breiveibys laukumā Reigā, bet sastdiņ, 9. junī, Ventspiļs nūvoda Puopē folklorys kūpā pīduovuos rūtalis i daņčus spieļu placī (20 minutu programa laikā nu 17.00 da 18.30), kai ari ar vīnu dzīsmi pīsadaleis nūslāguma koncertā 19.30 stuņdēs.

Vysu festivala “Baltica” programu var apsavērt ITE.

Folklorys kūpa “Ceidari” festivala “Baltica” skatē pārņ sajieme I pakuopi (44,2 punkti) ar viertejumu “gondreiž izcili”. Folklorys kūpa dybynuota 2013. godā Reigā i nu tuo laika ir pastuoveigs Latvejis folklorys kusteibys nūtikšonu dalinīks.