Latgaliskuos kulturys viests pyrmū reizi video formatā
Turpynojūt dūmuot par latgaliskuos kulturys ziņom dažaiduokūs i auditorejai interesantuokūs formatūs, bīdreibys “LgSC” uzturātais Latgalīšu kulturys ziņu portals lakuga.lv pyrmū reizi pīduovoj nūsavērt lagaliskuos kulturys viests video formatā – tymuos eisi par latgaliskuos kulturys nūtikšonam īprīškejā mienesī. Kulturys viests veidoj portals lakuga.lv, bet zinis izstuosta Dāvis Suharevskis, kuru vaira īpazynom kai kinys “Piļsāta pi upis” golvonuos lūmys atveiduotuoju.
Portala lakuga.lv ir plans ir itaida formata viests gataveit reizi mienesī. Ziņu satura redaktore, portala lakuga.lv atteisteibys vadeituoja Edeite Husare soka: “Apsazynojūt, ka pi izvēlis skaiteit viests latvīšu literarajā volūdā voi latgaliski, vys tei gribiešona nav latgalīšu rokstu volūdys vierzīnī, bet video formats i eisa hronometraža ir veids, kai par latgaliskuos kulturys nūtikšonam varim izstuosteit plotuokai auditorejai, nūturūt tuos uzmaneibu.”
Latgaliskuos kulturys viests cikom byus kai raidejums vīnu reizi mienesī ar atsavieršonu iz īprīškejuo mieneša latgaliskuos kulturys aktualitatem. Pyrmajā raidejumā var izzynuot par grupys “Latgalīšu Reps” jaunuokū video, Valerejis Seilis jubilejis nūtikšonom, Daugovpiļs dasacejumu Eiropys kulturys golvyspiļsātys titulam i cytom viestim.
Kulturys ziņu eistynuošona ir projekta “Latgaliskā kultūrtelpa: problēmas, analīze, atspoguļojums portālā lakuga.lv” daļa, tū finaņsej Medeju atbolsta fonds nu Latvejis vaļsts budžeta leidzekļu. Par raidejuma saturu atbiļd latgalīšu kulturys ziņu portals lakuga.lv. Cikom īcarāti seši ziņu raidejumi, bet tiks maklātys īspiejis, lai itaida formata viests varātu turpynuot ari iz prīšku.
Portala lakuga.lv komanda soka paļdis par atsauceibu i atbolstu ziņu sataiseišonā raidejuma vadeituojam Dāvim Suharevskim, video operatoram i montažys režisoram Sergejam Čakānam, grafiku veiduotuojam Krišjānim Pleiko (Upes kinostudija), Ivo Grigalim nu grupys “Latgalīšu Reps” i Diānai Soldānei nu “Daugovpiļs 2027”.
