Jūku i lobu emoceju vokors “Kas bez iuzu – tys bez bādys!” aizvadeits

Kai zynoms 2. februarī vysi celi vede iz Seiļukolnu, deļ tuo, ka tī nūtyka bīdreibys “Latgolys Studentu centrs” reikuotais nanormali glaunais i brīsmeigi nūpītnais pasuokums  “Kas bez iuzu – tys bez bādys!”. Pasuokuma mierkis beja jautrā, atraktivā veidā īpazeistynuot ļauds ar naseņ izguojušū latgalīšu izteicīņu, anekdotu, tostu i loba vieliejumu kruojumu.

Ar teatra prīkšnasumim Seiļukolnā gastieja Ambeļu i Varakļānu amtirteatri, Viļānu amatierteātris „KAS IR, TAS IR”, Rušuonys amatirteatris „Iz sitīņa”, Vuorkovys amatīrteatris “Kulda”, kai ari uzastuoja LgSC jaunīši i  Seiļukolna amatirteatrs, kai ari   vītejuos kundzeitis  — Matilde un Lokade.  Paļdis amizantajim pasuokuma vadeituojam Džonam (Arturam Tumovam) i Teklei (Juoņam Plešaunīkam)!

“Taiseit koč kaidu klasisku gruomotys prezentaceju ar garom runom par saturu voi procesu nasagrybieja. Deļ tuo izdūmuojom, ka ir juoreikoj atpyutys i lobu emoceju vokors ar amatirteatru prīkšnasumim. Paļdis par atsauceibu Seiļukolna Kulturys noma vadeituojai Anitai Upeniecei. Amatirteatri sovuos izruodēs cīši labi paruodieja  teicīņus, anekdotes, vieliejumus i tostus, kuri ir apkūpuoti gruomateņā. Prūtams, ka tyka paruodeiti ari jauni jūki, sadzeivis situacejis i smīkleigi dialogi.  Paļdis vysim kolektivim par daleibu! Asam prīceigi, ka pasuokums izadeve jautrs,” stuosta gruomotys projekta vadeituoja Dagneja.

Pēc prīkšnasumim LgSC aicynuoja vysus teatra kolektivus iz svātku klinģeri. Taipoš ļauds varieja īsaguoduot jaunuokus latgalīšu gruomotys, nūsabiļdeit foto styureitī, i kuorteigi izadoncuot balā, kuru spieleja muzykys grupa “Ivarmīns”.

LgSC pasateic vysim svātku organizatorim i atbaļsteituojim, ari bīdreibai “LR”. Gruomatenis “Kas bez iuzu – tys bez bādys!” var nūpierkt gruomotu veikalā “Jānis Roze”, veikalā “Liesma” Rēzeknē, veikalā “O!Marta” Daugovpilī, kai ari internetveikalā taiseitslatgola.lv.