Sajiutys par kinu “Vīna vosora deļ vysu”
Nu jau īt ūtrais mieness, kai LgSC Reigys biroja aktivistim i draugim beja īspieja nūsavērt Edgara Blinova kinu „Vīna vosora deļ vysu”. Seņ tys beja, bet dūmys i atzinis napamat pruotu vēļ šudiņ. Deļtuo beja vārts pagaideit i apkūpuot vysus komentarus.
Kinys sižets paruoda latvīšim tik aktualū temu par dorbu uorzemēs. Juosoka, rešajam Latvejis īdzeivuotuojam nav nivīna radinīka voi pazinis, kas nabyutu braucs pīsapelneit iz Angleju, Īreju voi cytu vaļsti. Tī, kas ir redziejuši kinu, īsoka tū nūsavērt arī cytim.
Beja īsarads ari vīns nu kinys akterim – Arturs Butkevičs, kurs pastuostieja par kinys filmiešonys guojumu, dažaidim atgadiejumim i nūtykumim, kai ari atbiļdieja iz myusu vaicojumim.
Kaidi ir myusu īspaidi par kinu?
Kristīne: Kina latgaliski, kas patīseibā ir stuosts na tikai par Latgolys laukim, Latgolys saimem, bet gon par vysys Latvejis saimem, kuruos kaids ir aizbraucs “meklēt laimi” uorpus sovys dzymtuos zemis. Drūši viņ emocejis raisieja vairuok tymūs cylvākūs, kurim ir leidzeiga situaceja jūs saimēs. Ītekmē nu Holivudys kinom, da pādejai minutei napamete sajiuta, ka tūmār jau jī vysi atsagrīzs atpakaļ. Kas tū zyna – varbyut simboliskuo atslāga mozuos meitinis rūkuos nūzeimej, ka byus “Vīna vosora deļ vysu II”, ar laimeiguokom beigom. I komplimenti kinys gola dzīsmes autoram. 🙂
Aiva: Iņteresna i aizkustynūša kina ar vysu jimā īkļautū suopeigū probļemu. Loba akterspiele, gaumeigi komiski momenti. Poša pasuokuma atmosfera muojeiga i sylta.
Edvards: Suokšu ar tū, ka kina ir izadavusi dīzgon loba. Stypruos pusis ir aktualitate i paruodeitais latgalīšu temperaments. Kina aktuala ar tū, ka itaidys situacejis myusdīnuos ir ik iz sūļa. Nabeja paruodeits deļkuo golvonī varūni aizbraukuši, tok, piec munom dūmom, tys ari beja pareizs režisora sūļs. Kuortejū reizi klausūtīs, cik vaļstī vyss ir švaki, maņ napatyktu. Kūpumā maņ napatyka pasuokuma apmekliejuma skaits – cīši moz cylvāku, koč ari vīta i laiks beja loba. Patyka ari uzaicynuotais kinys akters i juo stuostiejums.
Elvija: Vysu pyrma,vokors i atmosfera beja burveiga. Kina – aktuala, situaceja paruodeita tīši i korekti. Par kvalitati varu sprīst tik nu skateituoja pusis. Nui, beja kadri, kod lykuos, ka varātu ari sovaižuok, bet deļtuo jau ari tei ir amaterkina. Nadaudz napatyka puors akteru uzspāleiteiba, bet tai kai tī nabeja pyrmuo plana akteri, tod gols golā itys fakts tūmār tyka pīmiersts. Golvonū lūmu akterim – Urrā!!Super! Eistyni meistari! Paļdis, ka ir koč kas taids aktuals i latgalisks, gaideišu vēļ! 🙂
Agita: Kinys gola dzīsmi dzierdieju krītnu laiku pyrms pošys kinis nūsavieršonys. Jei izreiz palyka atmiņā, deļtuo dūmuoju, ka ari kinai juobyut lobai. Tai ari beja. Lels prīks par Olgu (kinā Ilzi), kura, piec munom dūmom, sovu lūmu atveiduoja cīši labi. Lepojūs, ka nu munys dzymtuos piļsātys nuok taidi talanteigi cylvāki. Kūpumā kina ir iņteresna i reala – ar ikdīnys probļemom, prīceigim i humoristiskim breižim. Lyka aizadūmuot par tū, cik tūmār loba dzeive ir laukūs i tī, kas vysu dzeivi pavadiejuši piļsātā, daudz kū ir zaudiejuši. Koč i Latgolu bīži nūviertej zamu, sokūt, ka ite nav dorba i nav kū dareit, es dūmoju, ka ir koč kas, kas latgalīšus apvīnoj – dūd spāku saglobuot sovu volūdu i vierteibys i īvuica prīcuotīs par tū, kas dūts. Lels pluss kinys vieršonuos vokorā beja sarunys ar Arturu Butkeviču, kurs stuostieja par filmiešonys guojumuu i atgadiejumim. Paļdis!
Kinys DVD var īsaguoduot LgSC birojūs Reigā i Daugovpilī.
Sokom lelu paļdis skateituojim, Arturam Butkevičam,
entuziastu grupai „BILDIS” i Reigys jaunīšu centram „Kaņieris”.
Agita,
“Latgolys Studentu centra”
Reigys birojs