Jūku dīnys prīškvokors

Reigā, 31. martā 19:00 Jūku dīnys 1. apreļa īskandynuošonai byusi gaideits sasatikt folkklubā “Ala Pagrabs” (Vacreigā, Smiļkts ūļneicā 16). Aicynojam latgalīšus i jūs draugus pi ola gluozis ci čaja kruškys pasadaleit ar smīkleigim atgadejumim iz dzievis, pastuosteit kaidu anekdotu i smeļtīs idejis 1. apreļam – Jūku dīnai, kai ari pi vysa catūrtdīnuos “Alā” ir vareiba sadzīduot kaidu dzīsmi.

Gatavejūtīs tam i atguodynuojumam – vacais, lobais, škārsteiklā apleik kleistūšais latgalīšu horoskops:

Vucyns (Auns)
Var byut lobi dakteri. Labi uorstej nu pohmeļa. Puišim pateik meitys a meitom puiši. I lobuok vairuok. Drusku slinki a cyti cīši struodeigi. Ka vāga, labi pļaun sīnu. Bīži īdzer, tod vysi ir draugi. Ļūti lobi cylvāki.

Teļš (Vērsis)
Pateik daudz runuot. Eipaši ka pylna sirds sazakrojuse. Nabogi. A cyti otkol cīši boguoti. Itim cylvākim gūvs vysod atdūd vysu pīnu. Ari poši nav skūpi. Par tū, ka dzāruoji, bet cīši lobi cylvāki.

Vui cik daudz (Dvīņi)
Troki mīreigi cylvāki. Ilgi dzeivoj par tū, ka cīši meilej īdzert. Vairuok dzeivoj pa muojom, a cyti otkol zyrgā juoj apleik. Tur daudz lūpu- suņu, kaču, vystys ari cytaidys reimys. Itim cylvākim vysi lobprot dūd iz poroda par tū, ka cīši lobi cylvāki.

Pūra trokīs (Vēzis)
Itim cylvākim nikod nav žāļ. Jautri cylvāki, cīši leli dzāruoji, tī kuri prūt dzīduot … kuri naprūt, toža. Pateik cytim vysu kū duovynuot a reizem poši kai duovonys. Struodeigi, leli buļbu laseituoji i runkuļu pliesieji. Cīši leli dzāroji, bet lobi cylvāki.

Strāšnīs (Lauva)
Cīši smaideigi i cīši taupeigi a cyti otkol nā. Daudz dzer ola a kas nadzer tī dzer pīna. Napateik, ka cyti troki palīk. Bīži sapynūs radz pavasari. Pēc tam skrīn iz krūgu olu dzert par tū, ka leli dzāruoji, bet gorā stypri i lobi cylvāki.

Buoba (Jaunava)
Cīši kuorteigi cylvāki a cyti otkol nā. Vysu labi atsacerās. Vysod zyna, kur batvini sastateiti a kur būrkuoni. Atsacerās ari kur īprīšk nūslēpe buteli, par tū ka cīši pateik īdzert. Vyspuor leli dzāroji. Jīm bīži īt gosti par tū ka cīši lobi cylvāki.

Spaņs (Svari)
Cīši gudri cylvāki a cyti otkol tikai smuki. Bīži vysu kū jūceigu izdūmoj. Ka smejās – vysa sāta skaņ. Labi guni kur i ēst taisa. A cyti daudz ād poši. Cīši draudzeigi, par tū ka leli dzāruoji, bet ļūti lobi cylvāki.

Rupucs (Skorpions)
Puiši kuori iz meitom a meitas iz puišim. Tī kas gudri, gotovi zvaigznes saskaitēt a tī kas nav gudri tī nā. Meitom pateik pučis a puišim ols. Goduos ari ūtraižuok. Vyspuor itī cylvāki cīši meilej īdzert. Kod iz pohmeļa suop golva nūzaspļaun i palīk vīgluok. Kai soka, kū tu lobam cylvākam padareisi.

Metiejs (Strēlnieks)
Cyti mienessierdzeigi a cyti otkol nā. Leli runuotoji i leli struodotuoji. Kod vuorej sīru, vysod saīt. Gondreiž. Kod vuorej olu, saīt vysod. Troki pateik bučuotīs, bet tikai tod, kod nav cīši pīdzāruši. Dvēselē cīši lobi cylvāki, koč i dzāruoji.

Ragaiņs (Mežāzis)
Daudz draugu koč i moz naudys. A cytim otkol daudz naudys. Pateik daudz ēst. Garšoj buļbu blīni. A kam nagaršoj, tod švaki. Itim cylvākim sātā vysod ir ols, par tū ka poši ir leli dzāruoji, bet ļaudis runoj, ka cīši lobi i uztycami cylvāki.
Žbaņķeļs (Ūdensvīrs)
Lels dzāruojs, bet lobs cylvāks. Kai bolūdeits. Moz ād. Cyti moš i daudz ād. Cīši sirsneigi. Leluokuo daļa ir tīvi. A cyti nav. Ka jim stuosteisi sovys bādys, jī saprūt. A ka stuosteisi prīkus, juonas butele. Itī cylvāki ir muoņticeigi. Bet kai īdzer vyss ir labi.

Osoka (Zivs)
Cīši gleiti cylvāki, bet na vysi. Ir leli muokslinīki. A kuri taidi nav, tī ļūti struodeigi. Cyti ir leli gulātuoji. Cyti leli doncuotuoji, par tū ka daudz dzer. Bet kū tu padareisi – ļūti lobi cylvāki.