Sovvaļnīks ar “Boltu susātivu”
Nu šudiņdīnys vasalu (voi ari tikai) nedeļu ekskluzivā veidā ar “Atlaižu kluba” i Latgolys Studentu centra starpnīceibu, taišni Tev pīeimams latgalīšu rokmuziķa Sovvaļnīka jaunais (nu jau ūtrais piec skaita) albums “Bolts susātivs”. Albumu pierc škārsteiklā, bet sajem kaidā nu LgSC birojim Reigā, Rēzeknē ci Daugovpilī.
Albumu meklej ite: http://www.atlaizuklubs.lv/lv/offer/ekskluzivi-tikai-atlaizuklubs-lv-latgaliesu-rokmuzika-sovvalnika-dubultais-cd-jaunais/
Vairadazynuošonai par “Boltu susātivu”:
Godu mejā izdūts Sovvaļnīka ūtrais albums „Bolts susātivs”, veļteits latgalīšu nūvodnīka, ailinīka Ontona Kūkuoja pīmiņai.
„Bolts susātivs” – albums, pi kura dorbu muzikis ar grupu pabeidze 2010. goda nūgolē, kab cīnejomuo latgalīša Ontona Kūkuoja septeņdesmit godu jubilejis dīnā dažys dīnys pyrma goda nūslāguma bez trūkšņa prezentātu tū šaurā lūkā ailinīka dzymtajūs Nautrānūs.
Albumu veidoj 10 dzīsmis, kurom vuordi jimti nu O.Kūkuoja ailem. Muzykys komponists i aranžejis leidzautors – Sovvaļnīks ci Ingars Gusāns. Īroksts nūritiejs divuos studejuos, tū taisejuši Gints Lundbergs i Gints Stankevičs, kas ir ari albuma miksa taiseituojs. Itymā albumā gaidoms akcents iz gitarspēli i smagniejs skanejums, kas kontrastej ar melanholiskū, mīreigū Sovvaļnīka debejis albumu „Sūpluok”, kas īgivs bolvys i radejs interesi par muziki vairuokuos Eiropys vaļstīs.
Ingars Gusāns par jaunū izdavumu: „Muns sapyns beja radeit rokeigu albumu. Centūs maksimali vysu skaniejumu dabuot piec īspiejis dzeivuoku, energiskuoku. Dūmoju, tys maņ kūpā ar grupys bīdrim i īrokstu meistarim ir izadevs. Nasabeistu sacēt, ka materiala i idejiskā ziņā „Bolts susātivs” ir leidzvierteigs cytim īvārojamim 2010. goda smoguos latvīšu muzykys izdavumim (grupu Skyforger, Heaven Grey albumi) i ir vysu laiku īspaideiguokais roka albums latgalīšu kulturā.”
„Bolts susātivs” jau dreižumā byus pīeimams tierdznīceibys vītuos vysā Latvejā. Precizs vītu saroksts tiks publicāts jaunatkluotajā muziķa sātys lopā www.Sovvalniks.lv, kur pošu reizi bezmoksys pīeimama dzīsme „Nav tuoļuok kur īt”. Nu 12. janvara vīnu nedeļu Sovvaļnīka albums CD ekskluzivi pīeimams www.AtlaizuKlubs.lv – komplektā ar muziķa debejis albumu par cenu 3,84 LVL.
