Piecpušdīne pyrms braucīņa iz Latgolu

Sataisieju diplomus jaunīšu rodūšūs dorbu konkursa daleibnīkim i lobuokūs dorbu autorim. Iz šmuka dzaltona papeira. Saguoja loba čupeņa gols golā. Dorbi raksteiti latgalīšu, latvīšu i krīvu volūduos. Lobi dorbi. Maņ patyka, cylvāki tūmār vēļ dūmoj, cer, tic, ir. Cylvāki jau nu cytys paaudzis, jaunī.

Nūkavieju gon viļcīni, cikom paraleli dorba dzelys, LgSC padareišonys i vēļ itys. Tok vys jau kai nabejs. Mož ar autobusu. Ituos pādejuos nedelis kai pa teļa syudim, dorba kai eļnis, dzeivis kai drozofilai.

Reit Rēzeknē Vuolyudzāni. Jau 9 tī juobyut. Niu dūmoju – palikt par nakti sātā i nu reita braukt ar mašynu voi raudzeit palikt par nakti pi kaida Rēzeknē i praleli vēl sabeidēt kaidys nabejs dzelys dorbim, idejom, projektim. Tai i dūmoju – dzeivuot voi izdzeivuot. Voi asu vysurguojiejs tanks i dorbu monstrys voi tūmār tikai cylvāks, kurs gryb sasabučuot ar suneiti i pagulēt sovā gultā.

Pareit Rēzeknis KN Boņuka bolvys pasnīgšona. Naticieju, ka Guntis itū paviļks. Laikam atroda paleigus i sevī gona spāka, laika, trokuma. Partū ka laika beja tik moz. Iz cytu godu juosuoc jau niule dūmuot. Lai nasaīt komuošonuos pādejā šaļtī. Par naudom tai i natyku gudra. Voi kuo vajag dagūši voi tikai vajadzeišonys piec. Voi vīnkuorši kuortejuo sprostuo nasapratne, ka A navar pīzvaneit B, a C naatbiļd B laiceigai i B padūmoj, ka mož eistyn nikuo navajag, ka jau navajag.

Lai byutu kai byudams, beidzūt ir pavasars. Sylts, sauleite. I es asu tikai cylvāks ar īsnom i kuosu, tok šaļtim na nu ituo pasauļa.

Ilze