Par LgSC i dzeivi!

Prīks, ka taida organizaceja kai Latgolys Sutdentu centrs oficiali dorbojās jau pīcus godus! Kai i vysim ari myus, vislobuok saīt tys, kū grybīs dareit, navys tys, kū vajadzātu. Vyslobuok ir tod, kod „grybīs” i „vajadzātu” sakreit!
Jau seņ jutom, ka vajag vīnu atpyutys vokoru, kuramā varātu dareit, vysu, kū grybīs. Nikaidu atskaitu, trešū personu tikai mes poši LgSC bīdri i aktivisti. I mudri vin acaroda ari „vajadzātu”- 2.novembris LgSC dibinuošonys goda dīna.
Pasuokuma formats tyka izvālāts kokteilu vokors- breiva sarunu i sajyutu baudeišona. Vysa centrā mes poši i kaids kruosains, spilgts dzierīns. Kokteils ir breivbilets ceļojumam laikā i telpā, pasauļa pilsūns, taipoš, kai i pa laikam mes poši. Kokteilu vokori parosti izavieršās cīši draudzeigi, i dinamiski, myusejais ari saguo cīši breineigs. Entuziasma pīplyudums vysai nuokušajai nedelei!
Cīši pateikami beja apsazynuot, ka ari cytuos vītuos Daugpilī i Reigā arī teik svynāta LgSC jubileja. Sasadzīduošonā caur Skypu ar Daugpils biroju, man līkās, ka bejom skaļuokī i stypruokī. (Ite Vita var napīkrist . ) Prauda gitarys myusim nabeja, bet kaidi bolsi! Acakluoja jauni talanti!
Es vaira nastuosteišu, kas i kai tī beja, deļ tam, ka itys nūtykums beja deļ seva! Ka grybit zynuot, nuokušū raizi atnuocit poši!
Puča pļovā aug i zīd na deļ sīna kozys, gūvs voi ļaužu, a deļ seva. Zīd, ir skaista i pateik cytim! Taipoš ir ar cylvāku, tykai tod, kod jis dzeivoj deļ seva, ir patīss i labsirdeigs – jis ir skaists. I taipoš ir ar saimi, organizaceju, valsti!
Lai myusim vysim ari iz prīšku izadūd byut patīsim i skaistim, tod ari vyss puorejais izadūs. Lobais pīvalk lobū! Lai jyusim īdvesmojūši reiti i lobys dīnys! Paļdis par īspieju darbuotīs LgSC i par breineigajim cylvāku i sajyutu kokteilim!
Bildē LgSC aktiviste Ilze- vinkuorša, pozitiva i skaista!

Dagneja