Stuosts par Zaļmuižys krūgim ari žurnala “Mājas Viesis” puslopuos
19. septembra žurnala “Mājas Viesis” puslopuos ir vareiba vaira izzynuot ap Rēzeknis nūvoda Zaļmuižys krūgim, par kū stuosta ekspoziceja “Iz krūdzeņu gluds bej’ ceļš”, kurū kūpā ar jaunīšu programys “LTG tu dū!” dalineicu Amandu Ludboržu eistynuoja latgalīšu kulturys kusteiba “Volūda”.
Žurnalā “Mājas Viesis” ir plots žurnalista Zigmunda Bekmaņa roksts kai par tagadejuo Nautrānu pogosta krūgim, tai ari ekspozicejis ideju i juos autori Amandu Ludboržu. “Volūda” cīši prīcojās, ka par kūpa dareitajim dorbim i Amandys ideju rūnās iņterese ari medejim, tai cerejūt, ka tei byus motivaceja kai Amandai pošai turpynuot sapynuot, dareit i stuosteit sovys pusis stuostus, tai i cytim jaunīšim giutīs pi sovu ideju padareišonys.
Atguodynuosim, ka ekspozicejis “Iz krūdzeņu gluds bej’ ceļš” idejis autore ir jaunīte Amanda Ludborža, kurei īsasaisteja latgalīšu kulturys kusteibys “Volūda” Latgolys izzynuošonys i jaunīšu izaugsmis programā “LTG tu dū!” i ar programys atbolstu eistynuoja sapynu par vizuali radzamu vītejuos apleicīnis krūgu stuostu. Ideja par krūgu pieteišonu jaunītei roduos, pasateicūt vacuokim, kuri niu jau treisdesmit godu puorvolda sātu Rogovkys centrā – vacajā krūga vītā. Amandys vacuoki piec Latvejis naatkareibys atjaunuošonys uzrunuoja veikala eipašnīku atjaunuot āku, kurā niu atsarūn puortykys i saimisteibys preču veikals “Sils” i ari jaunuo ekspoziceja. Ekspoziceja “Iz krūdzeņu gluds bej’ ceļš” viestej par sovulaik Zaļmuižys muižkunga Nikolaja Paulina fon Rozenšilda caltajim voi puorvaļdeitajim krūgim. Jamā apkūpuoti stuosti ap desmit apleicīnis krūgu – Kapiņu, Kristiņku, Calmu, Rekļa, Kosteļa, Rogovkys, Ostrānu, Ciskovys, Bliseņu i Mičuru krūgim. Vysi krūgi bejuši vierteiga vītejuos apleicīnis daļa ar sovim viesturiskajim faktim i stuostim. Par pīmāru, Kapiņu krūgs, kas atsarads pi Ičys upis, bejuse vīta meža struodnīkim, kurī pa Iču plyudynuojuši baļčus, bet Bliseņu krūgā sovulaik saiminīkuojuse latgalīšu literata, presis darbinīka Konstantina Krusta (Nautra) saime. Vaira par ekspoziceju ITE.
Stuostu ap krūgim kotrys interesents var izpieteit veikala “Sils” dorbalaikā kotru dīnu nu 8.00 da 18.00. Pi ekspozicejis var dabuot postkarti, kurys ūtrā pusē ir aizdavum-meikle, jū var atrysynuot, viereigi puorskaitūt ekspozicejis stuostu. Taipat ekspozicejis autore aicynoj daleitīs ar sevkuru informaceju i biļdem, kas līcynoj par vītejuos apleicīnis krūgim i ar laiku var paleidzēt papyldynuot ekspoziceju.
(Papyldynuots) Roksta digitalū verseju var puorskaiteit ite: https://lasi.lv/maja-gimene/stasti/latgales-novada-krogi-iz-krudzenu-gluds-bej-cels.19796
Objekta tapšonu finansiala atbaļsteja Rēzeknis nūvoda pošvaļdeibys latgaliskuos identitatis projektu programa, kai ari jaunīšu izaugsmis i Latgolys izzynuošonys programa “LTG tu dū!”, kurū latgalīšu kulturys kusteiba “Volūda” eistynoj ar Sabīdreibys integracejis fonda atbolstu nu Kulturys ministrejis daškiertūs Latvejis vaļsts budžeta leidzekļu.
