Jau trešū reizi “SPĀKA LAB” seminarūs calta Latgolys kulturys dzeivis organizātuoju i NVO puorstuovu kapacitate

Oktobrī Bolvūs i Rēzeknē jau trešū reizi aizvadeitys rodūšūs seminaru cykla “Spāka LAB” nūtikšonys, kurūs mierkis ir Latgolys kulturys dzeivis organizātuoju i navaļstiskūs organizaceju puorstuovu kapacitatis ceļšona. Bolvūs vaira tyka runuots ap pasuokumu reikuošonu i komunikaceju, taipat i latgalīšu rokstu volūdu, bet Rēzeknis seminarā vaira ap kvalitativu sadarbeibu ar medejim.

15. oktobrī seminarā “Pasuokumu reikuošona: naīrosti koncepti, komunikaceja i latgalīšu volūda afišuos” ar stuostu ap pasuokumu taiseišonys naīrostajim konceptim moza budžeta nūtikšonom, komandys motiviešonu i cytim ar pasuokumu reikuošonu saisteiti aspektim pīsadaleja režisore i rodūšuo direktore Una Rozenbauma. Ap nūtikšonu publicitatis kampaņu i dizainu, kur savīnuot tradicionalū i laikmeteigū, stuosteja rodūšuo direktore, dizaina i komunikacejis studejis “AUSME” leidzadybynuotuoja Dārta Apsīte. Vaļsts volūdys centra lingviste Māra Mortuzāne-Muravska stuosteja ap latgalīšu volūdys lītuošonu i pareizraksteibu pasuokumu afišuos.

Fotogalerejā: reportaža nu “Spāka LAB” Bolvūs, foto Amanda Anusāne/latgalīšu kulturys kusteiba “Volūda”

29. oktobrī nūtyka ari ūtrais seminars “Pasuokumu publicitate: attīceibys ar medejim i redakceju gaidys”. Pyrmajā dīnys daļā ar stuostu, kai sagataveit kvalitativu informaceju i veiduot attīceibys ar medejim, pasadaleja komunikacejis nūzaris profesionale ar vaira nakai 20 godu praktiskū pīredzi Kristīne Tjarve, bet ūtrajā daļā Latvejis Radejis Latgolys multimedeju studejis vadeituoja Renāte Lazdiņa i portala TVNET kulturys redaktors Tuoms (Toms) Treibergs pīduovuoja apsavērt, kaids ir masu medeju dorbs. Seminara nūslāguma sarunā “Medeji i kulturys informaceja. Kai uzturēt naatkareigys, bet lobys attīceibys?” interesentim beja vareiba izzynuot vaira ap Latvejis Radejis, TVNET, Latgolys Regionaluos televizejis i latgalīšu kulturys ziņu portala lakuga.lv redakceju i žurnalistu dorbu.

Rodūšūs seminaru cyklu, kurā kūpā pīsadaleja vaira nakai 60 daleibnīku, ar Latvejis Republikys Kulturys ministrejis i Latvejis Nacionaluo kulturys centra atbolstu reikuoja latgalīšu kulturys kusteiba “Volūda”.

Fotogalerejā: reportaža nu “Spāka LAB” Rēzeknē, foto Amanda Anusāne/latgalīšu kulturys kusteiba “Volūda”