Bīdreiba “Latgolys Studentu centrs” (LgSC) ir sabīdriska organizaceja, kas apvīnoj studejūšus i studejis beigušus jaunīšus, kam ir svareigi LgSC statutūs nūsaceitī mierki i aizdavumi.

LgSC mierkis ir popularizeit i veicynuot Latgolys nūvoda kuļturvidis, ekonomiskuos i socialuos vidis atteisteibu, koordinēt ar tū saisteitūs projektu izstruodi i realiziešonu.

LgSC devize – Latgolu saulē ceļt.

Latgolys studentu centra miseja ir saglobuot, popularizēt i atteisteit latgaliskuos kulturys vierteibys, nūdrūšynuot jūs dzeivuotspieju, pīlāguot ituos vierteibys itam laikam, izceļt latgaliskū latvyskajā, paruodeit jū kai vīnuotu, naatjemamu latvyskuo sastuovdaļu i veicynuot jaunīšu vydā izpratni par latgaliskajom vierteibom kai īpašom, atškireigom, unikalom i lapnuma vārtom, reizē nūsarūbežojūt nu politisku vaicuojumu rysynuošonys.

LgSC vīzeja: Dūd vacam gūdu, ej jaunam leidza!

Bīdreiba apvīnoj vairuokus desmitus Latgolys jaunīšu i ir realiziejuse taidus sabīdreibā atsauceibu īgivušys projektus kai jaunuos latgalīšu muzykys festivals “Muzykys Skrytuļs“, latgalīšu kulturys sātyslopa Lakuga.lv, koncertu ciklys “Taiseits Latgolā“, myusudīnu latgalīšu ortografejis nūsacejumu izdūšona i informativī seminari Rēzeknē i Reigā, latgalīšu rokstu volūdys kursi Reigā, latgalīšu dzejis antologejis “Susātivs” izdūšona, latgalīšu dzejnīku īkļaušona Dzejis dīnu diskā “Inflatio Poesis“, školuotuoju vosorys kursi “Vosoruošona” i jaunīšu seminars “Atzolys“, pīsadaleišona ekspedicejuos iz Sibiri pi tīnis latgalīšu, kai ari daudzi cyti bīdreibys vadeiti voi sadarbeibā ar cytom NVO, vaļsts i pošvaļdeibu institucejom realizeiti projekti.