Rss Feed Tweeter button Facebook button Youtube button
Latgolys Studentu centrs
Par LgSC dzeivi i sadzeivi
Nu Latgolys Studentu centra viesturis
Categories: LgSC viesture

Studentu organizaceju laime i nalaime reizē ir paaudžu maiņa – vīni atīt, cyti aizīt. Ka napasaveic, pa vydu ir puorruovums – tradicejis i suoktais dorbs pagaist.

Tai ari Latgolys Studentu centrs, kas atsajaunuoja 20. gs. 90. godu beiguos i ar aktivitatis kuopumim i krytumim struodoj da myusu dīnu, gon raudzeja puorjimt 90. godu suoku pīredzi i zynuošonys, tok reizem pat 5 godi ir par daudz – seviški jaunīšu organizacejai. Beidzūt studejis, jaunīši izkleist, suoc dorbu, īsasaista cytuos organizacejuos, nūdybynoj saimi, a cytim vyss juosuoc otkon nu gola. Darbeibys napuortraukteiba i nūtureiba ir vīns nu leluokūs jaunīšu organizaceju izaicynuojums.

Ite zamyškā konkursa “Mōras Zeme” nūlykums, kū Latgolys Studentu centrs izsludynuoja tuolajā 1991. godā – 20 godu sana viesture! Pīviersit viereibys organizacejis logo!  (: Ir bejs kai konts bankā, tai prīkšsieds, kas dzeivuojs Buļļu pilī (kojuos).

Tai kai latgalīšu ortografejis komiseja O. Breidaka vadeibā suoce struoduot tikai 90. godu vydā, raksteiba vēļ vacuo. Tok itymā dokumentā puors interesnu faktu nu Atmūdys laiku latgalīšu studentu dzeivis i latgaliskajom aktivitatem vyscaur.

Niulenejuos abreviaturys LgSC vītā lītuota LSC (kas ar laiku tyka atmasta, kab najuktu ar Latvejis Studentu centru). Sabīdriskuo studentu apvīneiba “Latgolas Studentu centrs” dybynuota 1990. goda 21. majā. Apvīneivys mierkis – apvīnuot Latgolys studentus rodūšam dorbam Latgolys lobā, vīnlaiceigi ceļūt jūs nacionaluos pošapzinis, kulturys i izgleiteibys leimini.

Pateikamai redzēt, ka jau tymā laikā studentu apvīneiba sasadorbuojuse ar LR Izgleiteibys ministreju Latgolys izgleiteibys sistemys problemu rysynuošonā, tok kas zyna, deļkuo rezultats i pa šai dīnai ir taids nikaids, koč sadarbeibai taidā gadīnī jau 20 godu i ari pārnejā i itymā godā LgSC bīdri pīsadaleja IZM dorba grupys sēdēs.

Ir bejs nūdybynuots Latgolys studentu fonds, kas pīškir premejis i stipendejis aktivuokajim studentim par studeju dorbim, kuru tema skar Latgolu  – ideja, par kū myusu dīnu LgSC ir dūmuojs jau ilguoku laiku, tok kam pītryucs naudys, energejis i mecenatisma. Varbyut niu, kod bīdreibys vaļdē īvālāta jau nuokušuo studentu paaudze i ryupēsīs par kasdīnys darbeibu, ar bīdreibys vacuokūs bīdru atbolstu i dorbu tys izadūs.

Lai itys viesturis materials dūd dorba sporu jaunajai vaļdei i bīdrim! (: Pastuovēs tys, kas puorsamaineis. A ilgi pastuovēs tys, kas saglobuos sovys saknis i nu jūs dzeis jaunys i svaigys atzolys.

Dūd vacam gūdu, ej jaunam leidza!

Pastuosti cytim!

Leidzeigī roksti:

1 Comment to “Nu Latgolys Studentu centra viesturis”

  1. Artis saka:

    Kazi kur ir tī vysi bīdri tādiņ i kū jī dora deļ Latgolys?

Leave a Reply