Rss Feed Tweeter button Facebook button Youtube button
Latgolys Studentu centrs
Par LgSC dzeivi i sadzeivi
Latgalīšu sabīdryskuos organizacejis aicynoj 27. aprelī vuiceibu stuņdis nūvadeit latgalīšu volūdā
Categories: Bez kategorejis

Latgalīšu sabīdryskuos organizacejis aicynoj Latgolys vyspuorizgleitojūšūs, profesionalūs i augstuokuos izgleiteibys īstuožu vuiceibspākus 27. aprelī nūdarbeibys (vuiceibu stuņdis, lekcejis) nūvadeit latgalīšu volūdā, taidā veidā styprynojūt Latgolys latvīšu pošapziņu, regionalū identitati i paruodūt cīnu viesturiskajim nūtykumim, kas lyka pamatu myusu vaļsts izveiduošonai.

1917. gods 26.–27. aprelī Latgolys kongresā Rēzeknē delegati pījēme viesturisku lāmumu – atsadaleit nu Vitebskys gubernis, līkūt pamatu Latvejis vaļsts izveidei. Pījimtajā rezolucejā tyka pastreipuots, ka Latgola patur [..] pylnu tisibu pašnuteikšonas woludas, ticibas, baznicas, skolu un saimestibas, kai ari zemes jautojumā, [..].

Piec symts godim 2017. gods 5.–6. majā, 4. pasauļa latgalīšu saītā Rēzeknē, izviertejūt 1917. gods Latgolys kongresā pījimtūs lāmumu izpiļdi, pījēme rezoluceju, ar mierki nūdrūsynuot latgalīšu volūdys i kulturys sovpateibys kai latvīšu nacejis boguoteibys, saglobuošonu, aizsardzeibu i atteisteibu.

Saīta daleibnīki vīnovuos, ka tuoļuok viesturiskuo 1917. gods Latgolys kongresa atcerei 27. apreļs ir svynama kai Latgolys dīna, īlīkūt jū lykuma „Par svātku, atceris i atzeimejamajom dīnom” 2. pantā kai atzeimejamu dīnu. Lykumprojektu piec Jura Viļuma iniciativys sagataveja i padeve LR Saeimai jau paguojušuo gods majā. 2018. gods 19. aprelī LR Saeimys Cylvāktīseibu i sabīdryskūs lītu komiseja itū lykumprojektu lēme vierzeit iz apstyprynuošonu Saeimā, pīduovojūt jū saukt par Latgolys kongresa dīnu.

Kab īdrūsynuotu školuotuojus lītuot latgalīšu (rokstu) volūdu ari izgleiteibys procesā, 27. aprelī sabīdreibā zynomi cylvāki dūsīs iz školom, kab taipat kai pārnejā godā uzrunuotu školānus nūvodvuiceibā.

Pedagogus itamā dīnā atbaļsteit, nūvodūt nūvodvuiceibys stuņdi, ir izsacejuši gataveibu režisors Viesturs Kairišs, literatis: Anna Rancāne, Ineta Atpile-Jugane, Sandra Ūdre, Ligija Purinaša, Karonhisake, žurnalisti: Tenis Bikovskis, Vineta Vilcāne, Skaidrīte Svikša, profesoris: Lidija Leikuma, Ilga Šuplinska, muzyki: Arnis Slobožaņins, Sovvaļnīks, Guntis Rasims, sabīdryskī aktivisti: Ruta Cibule, Harijs Bernāns, Andris Slišāns, Astrīda Vucina, Juris Viļums, Lolita Kivleniece-Kuzņecova, Agita Vigupe, Marta Binduka, Inese Germane i c.

Školom tiks duovynuota I. Šuplinskys, L. Rundānis, A. Andrejevys gruomota „Gostūs pi Boņuka” (2017), kai ari jaunuokī izdavumi – A. de Sent-Ekziperī tulkuojums latgaliski „Mozais priņcs” (tulk. E. Muizniece), i žurnala „Via Latgalica” 9., 10. numers.

Aicynojam ari cytus atbaļsteit latgalīšu volūdys atsagrīzšonu školuos i kasdīnys apritē. A tī, kas īdrūsynuoti raksteis sovus pīredzis stuostus par 27. apreļa volūduošonu latgaliski, izlūzis kuortā tiks pi travelnews.lv saryupātys duovonu kartis. Pīredzis stuostus varēs skaiteit ari www.lakuga.lv, jūs adresejit da 1. maja ilga13@inbox.lv. (Roksta apjūms latgalīšu volūdā da 3000 rokstu zeimu.)

Bīdreibys:

„Latgalīšu kulturys bīdreiba”
„Latgolys Saeima”
„Latgolas tradicionālōs kultūras centrs “Latgaļu sāta””
“Latgalīšu volūdys, literaturys, kulturviesturis školuotuoju asociaceja”
„Latgolys Studentu centrs”
„Kukuži”
Reigys latgalīšu bīdreiba „Trešō zvaigzne”
„Tautsaimnieks”
„Kroma kolna bruoliste”
„Latgolys Producentu grupa”
„Upītes jauniešu folkloras kopa”

Pastuosti cytim!

Leidzeigī roksti:

Leave a Reply