Vosorys izklaidis – idejis, projekti i koncerti

Šudiņ vokorā Tonis birojā projektu vokors. Reit turpynuojums itai izklaidei. Kai smejīs, cytim vosora, a cytim i vosora, i juodūmoj par rudini.

Ite zemļuok karteņa nu paguojušuos nedelis izprīcom ar SIF projektu, kas gols golā īsīts svēre 2 kilogrami i symtu gramu. Ireta i Artis cap i lej iudini. Koč kai tei latgalīšu volūda juodaboj iz zaļa zora, vysam vajag naudys.

Ass īsnīgts pusūtra symta projektu, vysā naudys 10 projektim. Cereibu moz, dorba īlykts da byudu. Juorauga cerēt i vysleidza dareit sovu.

Reitvokor nu suoku aizīsim apsavērt, kai izaver RTU. Seņ nav radzāta. Juosuoc dūmuot par Dzejis dīnom, kur otkon saguoja īsakuļt – LgSC taisa 2 pasuokumus kūpā ar Rakstnīku savīneibu: tradicionaluos dzejis pīkritiejim, nūvodu dzejnīkim Breivdobys muzejā i jaunajim i trokajim tehniski dzejisku pasuokumu. Galiejeibys īdvasmoj, obi goli bārna pruotā – i vacī, i jaunī. Nu labi, na bārni, a jaunīši i studenti. Jī ari bārna pruotā šaļtim.

Piečuok reit 18:00 stuņdēs koncerts Dūma laukumā – grupai “Bez PVN” jauns klips.

Jau 1. augustā Leivuonūs, Začu solā, Latgolys muzykys festivals. Lakugā ļauds bādoj, ka vysā nalatgaliskys. Sok, Latgolys, ni latgalīšu festivals. Tok  laikam jau tei Latgola taida ir – latgaliski tik sātā kluseņom i pa dzārumam voi tod, ka vajag puordūt eksotiku ci dabuot bolsuotuojus šovūs.

Nu LgSC ap itū projektu jemās Jureits, koč jūkainai projekta sātyslopā pi sadarbeibys partneru naredzēt ni LgSC vuorda, ni logo – tik LgSC projektus “Taiseits Latgolā // Made in Latgola” i Lakuga.lv. Nu ūtrys pusis, nav juobyut par spryudzini vysuos pakalēs i na vysom pakalem vajag spryudziņa.

Golvonais, ka pasuokumā byus daudz latgalīšu grupu, daudz latgalīšu i pasuokums nūteik par speiti vysaidom krīzem i nabyušonom. Capuri nūst organizatorim, kas sasajēme i taisa!

Jau svātdīņ Preiļūs suoksīs jaunīšu seminars “Atzolys”. Vaira informacejis par itū Lindys Orolis vadeitū projektu piečuok.

Ilze