Vokora styga izstaiguota
3. oktobrī latgalīšu kulturys kusteibys “Volūda” Reigys aktivisti aicynuoja studentus i vysus cytus, kas sirdī jiutās jauni, atrast latgaliskuos vītys Reigā i pošim rodūši izpiļdeit organizatoru dūtūs aizdavumus.
“Vokora styga” ir tradicionals bīdreibys fotoorientiešonuos pasuokums, kū nu 2008. goda reikojam tim jaunīšim, kuri nu Latgolys atbrauc studēt iz Reigu. Bīdreibys mierkis ir bejs i pošim īpazeit jaunīšus, i sapazeistynuot jūs sovā vydā.
Itymā godā “Vokora stygā” pīsadaleja 4 komandys – “Kopejs ai sīru” (pyrmuo kursa studeņtis nu Zīmeļlatgolys, kuru vydā jaunīšu programys “LTG tu dū!” dalineicys), “Kuorsavīši” (saime nu Reigys, bet ar saknem Ludzys nūvodā), “Austrumu gudrī” (dāmys, kas cīši lapnojās, ka ir nu Baļtinovys) i “Pītura iz Latgolu” (Upeitis jaunīši). Geografiski itūgod kotrā ziņā napuorspāta palyka Zīmeļlatgolys puorstuovnīceiba.
Komandu aizdavumūs, par pīmāru, beja – atrast i nūsabiļdēt ar Latgolys karūgu i kaidu gruomotu latgaliski voi par Latgolu; saprast, kur Reigā ir latgaliska kebabneica, nūsabiļdēt Kaļvu i Vieveru ūļneicys styurī i atrast, kur atsarūņ Fraņča Trasuna pīminis pluoksne; beja juosataisa vizualizaceja latgalīšu tautysdzīsmei “Auga, auga rūžeņa” i juoizfiļmej, kai sadzīd kaidu latgalīšu tautysdzīsmi ar garumguojieju. Uzvarys laurus plyuce komanda “Kopejs ai sīru”.
