Sesejis pabals Daugavpilī

4. februarī LgSC Daugavpiļs birojs aicynuoja studentus iz „Sesejis pabalu”, kas kei jau īrosts nūtyka kopejneicā „Sāta”.

Pasuocīņa golvonuo tema beja ols. Cytam līkās – ols, nu, kas ta tys par pasuocīni, bet a par kū nā!? Gatavojūtīs pasuocīņam, pīmekliejam dzīsmis i biļdis par olu, stumdiejam mebelis, i Dagnija sagatavuoja uzkūdys, kas sader ar olu.
Īejis atslāga pasuocīnā beja ols, kuru katrs apmaklātuojs beja izavieliejs piec sovys gaumis.
Draudzeigā kompanejā suokam īpasazeit vīns ar ūtru i pastuosteit par sevi i sovu pīredzi ar olu. Piec tam sekuoja ola degustaceja. Raudziejam vīns ūtra atnastū olu i lykam viertejumus, lai nūskaidruotu vokora gorduokū olu. Leluokū popularitati izapeļnieja „Grāfs fon Zīverss”, kuru dabuovam raudzeit pat treis reizis. Tai pat nūraudziejam na tikai olu, bet ari veikalu plauktūs popularūs ols dzierīņus.
Agris beja tys drūsminīks, kas pastuostieja, ka olu suocs baudeit tikai pyrms pusgoda i suocs kruot ols pudelis. Juo kolekceja tyka veiduota ar mierki atrast gorduokū olu. Pavysam kolekcejā ir vaira kei 100 ols pudeļu i kotra sovaiduoka. Agris pat paruodieja biļdis ar sovu kolekceju i poštaisātejim plauktim. Ar Agra kolekceju bejs na vīns vīn smīkleigs gadiejīns: Agra gosts reitā pasamūds, īraudziejs pylnu plauktu ar tik daudz ols pudeļom i dūmuojs voi nūklivs dabasūs voi eļņī.
Turpynuovam vīns ūtru izklaideit ar interesantim pīdzeivojumim, stuostiejam anekdotus par olu i spieļuovam spielis, lai nūskaidruotu veikluokūs ols cīneituojus. Nūskaidruovam sovu ols dzeršonys čempioni, kura apsteidza myusu kompanejis vīneigū puisi — tei beja Liene.
I kur nu ols bez lobom dzīsmem. Pasuocīņa nūslāgumā kūpeigi dzīduovam tautā pazeistamys dzīsmis.
Piec taida pozitivu emoceju pīplyuduma secynuovam, ka taidys sasalaseišonys juoreikoj bīžuok. Dieļ tam, ka piec pīpildeitys studeju dīnys nav nikuo lobuoka par draudzeigu kompaneju i skaneigom dzīsmem.

Gunta Nagle

LgSC Daugavpiļs birojs