Sataiseits ostoņu sereju raidīroksts “Volūda. LTG” par latgalīšu volūdu i tuos dažaidajim aspektim

Kab lobuok izzynuotu latgalīšu volūdu, kai ari volūdys kai taidys dažaidūs aspektus, bīdreiba “LgSC” sagatavejuse ostoņu sereju raidīrokstu “Volūda. LTG”, kurā sarunuos ar filologejis profesori, Latvejis Universitatis Humanitarūs zynuotņu fakultatis pasnīdzieju Lideju Leikumu, teik izzynuoti dažaidi vaicuojumi par volūdu. Raidīrokstā apsavārtūs vaicuojumu vydā ir latgalīšu rokstu volūdys izaveiduošona, volūdys saglobuošona, latgalīšu Sibirī volūda, personvuordu i vītvuordu situaceja latgaliski i cyti aspekti.

Jaunuo raidīroksta “Volūda. LTG” idejis autore, bīdreibys “LgSC” vadeituoja Edeite Husare soka: “Tai kai itūšaļt ir situaceja, kod par latgalīšu volūdu vaira var izzynuot viņ pošvuiceibys ceļā, jo volūdys studejis ir cīši īrūbežuotys i paradzātys šauram interesentu lūkam, gribiejom, izmontojūt profesoris Lidejis Leikumys pīredzi, zynuošonys, kai ari nanūviertejamū īguļdejumu latgalīšu rokstu volūdys atteisteišonā, par latgalīšu volūdu, bet reizē ari volūdu kai taidu, izstuosteit sabīdreibai vaira. Sarunuos pamatā raudzeits atbiļdēt iz vaicuojumim, deļkuo volūdu vajadzātu kūpt, saglobuot, taipat apsarunuot i izzynuot vaira par specifiski latgalīšu volūdys vaicuojumim, kas skar dažaidys temys. Turim nūceju, ka itī raidejumi paleidzēs atbiļdēt iz kaidim naskaidrajim vaicuojumim par latgalīšu rokstu volūdu.”

Nu cytu raidīrokstu itys atsaškir ar tū, ka vysuos serejuos pīsadola profesore Lideja Leikuma, bet kotrom divejom serejom ir cyts sarunys vadeituojs, kab raidīroksta sarunu temu apsprīsšonu padareitu dažaiduoku i plašuoku. Raidīrokstu voda: latgalīšu volūdys interesente, Instagram konta @pina_golds veiduotuoja Vizma Mičule, latvīšu volūdys specialiste Daina Blažēvica, latgalīšu kulturys ziņu portala lakuga.lv vadeituoja Edeite Husare, kai ari muzikis, latvīšu volūdys dažaideibys viesteituojs Kārlis Kazāks. Taipat vīnā nu sereju kai gaška pīsadola ari “Valodu māja” puorstuove Elīna Kokareviča.

Raidīrokstā “Volūda. LTG” ir ostonis serejis, kurys publicātys vīnlaiceigi, kab jau par reizi kotrys varātu nūsavērt sev interesejūšu vaicuojumu. Tymūs apsavārtys itaidys temys:

#1 Volūdys puorsameišona i jaunvuordi

#2 Kai veidojās rokstu volūda?

#3 Sibira latgalīši i jūs volūda

#4 Izlūksnis i rokstu volūda

#5 Kai vuiceitīs latgalīšu volūdu?

#6 Senejuokuos volūdys formys

#7 Personvuordi i vītvuordi

#8 Kai volūdu saglobuot?

Raidīrokstu var nūsavērt video formatā bīdreibys “LgSC” YouTube kanalā. Raidīrokstu veiduojuši Edeite Husare (ideja i temu saturs), Kristīne Pokratniece (menedžments) i Elmārs Pēterāns (video). Biedrība “LgSC” lelu paļdis soka vysim raidīroksta vadeituojim, profesorei, gostim, kai ari Latvejis Universitatis Humanitarūs zynuotņu fakultatei par atsauceibu raidīroksta fiļmiešonys nūrisē.

“Volūda. LTG” tapšonu atbaļstejs Sabīdreibys Integracejis fonds nu Kulturys ministrejis daškiertūs Latvejis vaļsts budžeta leidzekļu bīdreibys “LgSC” projektā “Latgaliskuos kulturvidis organizaceju sadarbeibys i sabīdreibys zynuošonu styprynuošona”.