Sataiseita latgalīšu volūdys i komiksu muokslys darbneica “Sunāns ceļoj”
2023. gods suokuos izguoja Laurys Melnis i muokslineicys Viviannys Mariis Stanislavskys pyrmais komikss bārnim latgaliski “Sunāns breiveibā”, kas dabuoja kai skaiteituoju atzineibu, tai i sajēme Latgalīšu kulturys goda bolvu “Boņuks 2023” i Latvejis vaļsts mežu specialbolvu par debeju bārnu literaturā “Jaunaudze” Storptautyskajā Jāņa Baltvilka bolvā bārnu literaturā. Niu obeju komiksa autoru sadarbeibā radeita latgalīšu volūdys i komiksu muokslys darbneica “Sunāns ceļoj”, kas byus daīmama programys “Latvejis školys sūma” pīduovuojumā.
Komiksa “Sunāns breiveibā” autoris Laura Melne i Vivianna Maria Stanislavska sadarbeibā ar režisori Lienu Šmuksti radejušys rodūšū darbneicu “Sunāns ceļoj”. Darbneicys mierkauditoreja ir 3.–6. klasis školāni i jei diveju vuiceibu stuņžu garumā (40+40 minuti) pīduovuos vaira izzynuot latvīšu volūdys dažaideibu i komiksu muokslu. Darbneicys pyrmajā daļā byus strukturāta saruna par latvīšu volūdys dažaideibu – bārni kūpā ar komiksa golvonū varūni Sunānu ceļuos pa Latvejis karti i izzynuos, ka ļauds Latvejā runoj vysaidi. Taipat jī īpasazeis ar latgalīšu rokstu volūdu, kas ir viesturyskys latvīšu volūdys paveids, kurā ari radeits komikss “Sunāns breiveibā”. Darbneicys praktiskajā daļā školāni izzynuos vaira par komiksa žanru i varēs sataiseit poši sovu komiksa gruomateņu.
Rodūšū darbneicu papyldynoj eipaši sagataveits objekts – salīkama Latvejis karte, kai ari dorba lopys sovu komiksu radeišonai. Vīnā darbneicā reizē var pīsadaleit da 30 školānu, nūtikšonys vīta var byut sevkur Latvejā – kur školai i školānim ir interese izzynuot vaira kai par latvīšu volūdys dažaideibu, tai par latgalīšu rokstu volūdu i komiksu žanru. Školai nu sovys pusis darbneicai byutu juonūdrūsynoj ekrans i projektors. Darbneicys dorba volūda – latvīšu literaruo i latgalīšu volūda, pīsamārojūt auditorejis prasmem i zynuošonom. Rodūšuo darbneica tiks davīnuota programys “Latvejis školys sūma” katalogam. Vaira informacejis, sasazynojūt ar latgalīšu kulturys kusteibu “Volūda” vasals@voluda.lv.
Fotogalerejā: rodūšuos darbneicys nūtikšonys kadri, publicitatis foto, foto nu Siguldys nūvoda pošvaļdeibys i Jānis Puorietis.
Programa “Sunāns ceļoj” topuse ar Vaļsts kulturkapitala fonda mierkprogramys “Programmas “Latvijas skolas soma” satura radīšana” finansialu tolkā īšonu.